Debleskri gili 36 - O Debleskro Drom 2021 (Sinte)

O Debleskro latchepen hi baro

¹ I gili o rajeske pral i gipangre. O David, ko baro Debleskro budepaskro, kras kai gili.

² O tchilatchepen hi o tchilatcheske an o rat. Job kamell o Deblestar tchi te djinell un darell lestar gar.

³ An peskre jaka hi kowa jaake shukar, hoi lo krella, te haiwell lo gar, kai kowa i doosh hi, kai hunte rikrals pes lo latar pale.

⁴ Tchi har midjak un chochene laba wenn dran leskro mui win. Latcho koowa haiwell lo buder gar te krell.

⁵ Te hi lo ap peskro tchiben tchiddo, djal o tchilatchepen an leskro shero trujel. Un job rikrell soreles ap i drom, hoi gar mishto hi, un rikrell pes gar pale, te krell lo o tchilatchepen.

⁶ Baro Dewel, tiro latchepen hi jaake baro har o bolepen. Un tiro kamlepen ap tire menshende djal bis pash i wolke.

⁷ Tiro tchatchepen djal jaake pre har i bare berge. Un i tchatche laba, hoi tu win rakreh, djan dur tele har o baro pani. Baro Dewel, tu deh i menshen un i viechen kowa, hoi len hunte well.

⁸ Har railo hi tiro latchepen, miro Dewel! I menshe wenn pash tute, te rikress tire wasta pral lende, har i tchirklo rikrell peskre mussja pral peskre terne.

⁹ Tu tchoreh pral lende latcho koowa dran o brawlepen an tiro kheer. Un deh len tiro latchepen te pijell, har te pijans le latcho pani.

¹⁰ Tu hal o djido pani, hoi newo djipen della. Tu hal i momeli maro djipaske.

¹¹ Tchip tiro latchepen ap kolende, kai tut prindjrenna, un muk tiro tchatchepen te well kolenge, kai shunenn ap tute o tselo djijestar.

¹² Muk i pre-phurden gar te stakrenn le man tele. Kre te nai tradenn man i tchilatche gar dran miro kheer win.

¹³ Dikenn, i tchilatche peran! Jon hi tchiddo ap i phub, un nai stenn gar buder pre.