Debleskri gili 33 - O Debleskro Drom 2021 (Sinte)

I gili, hoi sharell kowa lauter, hoi o Dewel krell

¹ Tumer, kai an o tchatchepen tardo han, denn gole i bachtjatar pral kowa, hoi o baro Dewel krell. Hi mishto, te sharenn les, tumer, kai tumaro tselo djijeha ap leste shunenn!

² Parkrenn tumen pash o baro Debleste, un bashrenn leske ap dorjengre bashepangre! Giwenn leske gilja, un bashrenn leske ap i bashepaskri i deesh dorjentsa!

³ Giwenn leske i newi gili! Krenn shukar bashepen un denn gole i bachtjatar!

⁴ O baro Debleskro lab hi tchatcho. Un kowa, hoi krell lo, hi sorelo.

⁵ Job kamell i tchatche dromma un i tchatche laba. Un i tseli phub hi pherdo latchepen o baro Deblestar.

⁶ Dran o lab o baro Deblestar was o bolepen kerdo. Dran o ducho, hoi dran leskro mui djas, wan i tsele bolepangre momlia kerdo.

⁷ Job rikrell i bare panja khetne har an i gono, un tchiwell i bare panja khetne har an i kheer.

⁸ I tseli phub hunte darell o baro Deblestar, hakeno, kai ap i phub djiwella, hunte penell leske: “Tu hal o Dewel.”

⁹ Job te rakrell, palle well, hoi job penas, jaake har lo kowa penas, jaake hi kowa koi tardo.

¹⁰ O baro Dewel mukell kowa gar te well, hoi kol menshe an i wawar themma kamenn te krell. Lenge tchiwell lo barra an o drom.

¹¹ Kowa, hoi o baro Dewel kamell te krell, atchell soreles tardo, un kowa, hoi les an peskro dji hi, te krell lo, atchell jaake rah har menshe koi hi.

¹² Bachtele hi kol menshe, kolengro Dewel o baro Dewel hi, kol menshe, kai job peske wi-rodas, te wenn le leskre menshe.

¹³ O baro Dewel dikell tele dran o bolepen, un dikell i tsele menshen.

¹⁴ Job hi beshdo ap peskri rajeskri beshepaskri un dikell ap lauterende, kai ap i phub djiwenna.

¹⁵ Job tchiwell lenge an o dji, hoi te krenn le, un dell jak ap lauter, hoi jon krenna.

¹⁶ I baro rai bud lurdentsa well gar dran peskri soor o sorleder an o kurepen. Un i tchatcho mursh, koles bud soor hi, well gar dran peskri soor win lino dran o kurepen.

¹⁷ Hi witar gar i graja, kai nai lenn win dran o kurepen, ninna te hi len bari soor.

¹⁸ Kowa hi o baro Dewel, kai dell garda ap kolende, kai djiwenn leha, kolla, kai dikenn ap leste, te well lo lenge latcho,

¹⁹ un lell lengro djipen dran o merepen win. Ninna te well bari bok pral o them, merenn le gar.

²⁰ Mer rikrah men ap o baro Debleste maro tselo djijeha. Job well ap mari rig, un rikrell peskro wast pral mende.

²¹ An leste hi maro dji bachtelo, un mer rikrah men ap leste, kai hi kokres o Dewel.

²² Dik, har mer dikah ap tute, baro Dewel, jaake muk tiro latchepen pral mende te well!