Debleskri gili 24 - O Debleskro Drom 2021 (Sinte)

O baro Dewel well an peskro kheer

1 I gili o Davidestar.

¹ I gili o Davidestar. O baro Debleske hi i phub un lauter, hoi koi pre hi, awa, i tseli phub un kolla, kai kote djiwenna.

² Job kras lat un tchiwas lat pral o baro pani, un rikras lat soreles pral i panja.

³ Koon hi kowa, kai ap o baro Debleskri berga nai djal? Koon hi kowa, kai an leskro kheer nai tardo atchella?

⁴ Kawa, ap koleskre wasta kek doosh hi, un koles i djudjo dji hi. Kowa, kai djiwell gar peskro djipen ap chochepen, un dell pes gar chocheni sowel.

⁵ Sawo lell bacht o baro Deblestar. Leskro Dewel hi ap leskri rig un dell les tchatchepen.

⁶ Jaake hi i menshe, kai pal leste putchenna, un pash leste wenna. Jon hi i tchatche tchawe o Jakobestar.

⁷ Krenn i bare wudja buchles pre! Awa, krenn kol phure wudja bares pre, te nai djal o baro rai dren, kones o tselo railepen hi.

⁸ Koon hi kau baro rai, kones o tselo railepen hi? Kowa hi o baro Dewel, ko sorelo kurepaskro, awa, o baro Dewel hi sorelo an o kurepen.

⁹ Krenn i bare wudja buchles pre awa, krenn kol phure wudja bares pre, te nai djal o baro rai dren, kones o tselo railepen hi!

¹⁰ Koon hi kau baro rai, kones o tselo railepen hi? Kowa hi o baro Dewel, ko rai pral o bolepen un i phub. Job hi o baro rai, kones o tselo railepen hi.