Debleskri gili 147 - O Debleskro Drom 2021 (Sinte)

Hoi o Dewel lauter peskre menshenge kras

¹ Halleluja! Sharenn o baro Debles! Latcho hi, te giwas gilja maro Debleske! Shukar un mishto hi, te bashras leske.

² O baro Dewel tchiwella Jerusalem pale pre, un lauteren, kai krik tradedo wan, anell job pale khetne.

³ Kolen, kai lengro dji phagedo hi, krell lo pale sasto, un kolenge, kai dukedo hi, tchiwell lo i pandepen pre.

⁴ Job ginell i bolepangre momlia tele un kharell lengre laba.

⁵ Baro hi o Dewel, maro rai, un les hi bari soor. Kowa lauter, hoi job an peskro goswepen krella, haiwah nai gar.

⁶ O baro Dewel hadell kolen pre, kai tele rikedo hi, un i tchilatchen witsrell lo tele ap i phub.

⁷ Giwenn i gili o baro Debleske! Parkrenn tumen pash leste! Bashrenn maro Debleske ap i harfa!

⁸ Job tchiwell wolke ap o bolepen, dell brishin ap i phub, mukell o senlepen bares te well ap i berge.

⁹ I viechende dell lo pengro chapen, ninna i terne korake, hoi pal chapen gole denna.

¹⁰ I grajengri soor hi leske gar shukar, witar gar i murshengri soor.

¹¹ O baro Debleske hi kolla shukar, kai leha djiwenna un ap leste dikenna, te well lo lenge latches.

¹² Tumer menshe an o foro Jerusalem, sharenn o baro Debles! Tumer dran o foro Zion, hadenn tumaro Debles!

¹³ Kol bare foreskre wudja krell lo soreles, un ap tumare tchawende tchiwas lo peskri bacht.

¹⁴ Kek kurepen well an tumaro them, un o latcheder djob dell lo tumen te chal.

¹⁵ Job penell, hoi te djal ap i phub. Un sik djal kowa, hoi penas lo.

¹⁶ Jaake mukell lo gib te perell, parno har bakrengro bal, un witsrell djajedo pani har jagakri tchik.

¹⁷ Bare brishineskre barra witsrell lo ap i phub; un bitchrell baro shilapen. Koon nai atchell an kawa shilapen?

¹⁸ Job penell i lab, un o gib well pani; job bitchrell i ducho, hoi phurdell pral i phub, un o pani, hoi djajedo his, nashella palle.

¹⁹ O Jakobeskre menshen mukell lo peskro lab te shunell; un ap i Israelitarja penell lo, hoi lo lendar kamell, un dell len peskre tchatchepaskre laba.

²⁰ Kowa kras lo kek wawar menshenge. Leskre tchatchepaskre laba prindjrenn jon gar. Sharedo well o baro Dewel!