Debleskri gili 137 - O Debleskro Drom 2021 (Sinte)

I pandle Israelitarja giwenn i ropaskri gili

¹ Pash i panja an o foro Babilon hams beshdo un rowan, har menge o Zion an o shero was.

² Mare harfe tchiwam kote ap kol ruka.

³ Kolla, kai men tapran, kaman, te giwas lenge i gili: “Giwenn menge i gili pral o Zion”, penan le.

⁴ Har nai giwams o baro Debleske i gili an i wawar them?

⁵ Bistrau me tut, Jerusalem, mu merell tele miri tchatchi mussi!

⁶ Miri tchip te atchell pral an miro mui, me te bistraus tut, Jerusalem, me te kamaus tchomone budeder har tut.

⁷ Baro Dewel, ma biste gar, hoi i Edomarja kran, har jon ap ko diwes gole dan an i Jerusalem: “Phagenn o foro tele! Phagenn les tele bis ap o telstuno bar!”

⁸ Tu, foro Babilon, tu, kai lauter an kotja deh! Bachteles well kowa, hoi tuke pale della kowa, hoi tu menge kral!

⁹ Bachteles well kowa, kai tire tchawe taprella un len ap i bare barra mulo witsrella!