Debleskri gili 115 - O Debleskro Drom 2021 (Sinte)

O Dewel kokres hi moldo, te well lo sharedo

¹ Tu kokres, baro Dewel, wess sharedo! Tu hunte wess sharedo, gar mer! Tu hal kowa, kai latcho hi un hako tsiro peskro lab rikrell.

² Hoske penenn i wawar menshe: “Kai hi lengro Dewel?”

³ Maro Dewel hi an o bolepen, un job nai krell lauter, hoi lo kamella.

⁴ Lengre debla hi dran rup un sonakai. Menshengre wasta kran len.

⁵ I mui hi len, un jon nai rakrenn gar. Jaka hi len un jon nai dikenn gar.

⁶ Kanda hi len, un jon nai shunenn gar. I nak hi len, un jon nai sungenn gar.

⁷ Len hi wasta, un jon nai taprenn tchi an. Herja hi len, un jon nai djan gar. Kek gole well dran lengri meen.

⁸ Kol menshe, kai sawe deblen kran, un ap lende patsenn, mu wenn le jaake har jon!

⁹ Tumer Israelitarja, rikrenn tumen ap o baro Debleste! Job well ap tumari rig, un rikrell peskre wasta pral tumende.

¹⁰ Tumer rashaja dran o kheer Aron, rikrenn tumen ap o baro Debleste! Job well ap tumari rig, un rikrell peskre wasta pral tumende.

¹¹ Tumer, kai djiwenn o baro Debleha, rikrenn tumen ap leste! Job well ap tumari rig, un rikrell peskre wasta pral tumende.

¹² O baro Dewel bistras men gar, un tchiwell peskri bacht ap mende. Job tchiwell peskri bacht ap o kheer Israel. Job tchiwell peskri bacht ap i rashajende dran o kheer Aron.

¹³ Job tchiwell peskri bacht ap hakeneste, kai djiwell leha, awa, ap i tiknen un ap i baren.

¹⁴ Mu dell tumen o baro Dewel bud tchawe, tumenge un tumare tchawenge!

¹⁵ Mu well ap tumende i bacht kolestar, kai o bolepen un i phub kras.

¹⁶ O bolepen hi o baro Debleske kokres. I phub das job i menshende.

¹⁷ Baro Dewel, i mule sharenn tut gar, kek, kai an o mulengro them djal, kote, kai tchi buder rakedo wella.

¹⁸ Mer, i djide, sharah tut kanna un hako tsireske. Sharedo well o baro Dewel!