Debleskri gili 111 - O Debleskro Drom 2021 (Sinte)

Baro hi kowa, hoi o Dewel krella

¹ Sharedo well o baro Dewel! Miro tselo djijestar sharau o baro Debles kote, kai kolla khetne wenna, kai o tchatcho drom djan.

² Baro hi kowa, hoi o baro Dewel lauter kras. Koneske kowa an o shero trujel djal, kowa well bachtelo.

³ Kowa, hoi o baro Dewel krella, hi railo un shukar. Un leskro tchatchepen atchella hako tsireske.

⁴ Job mukell men gar te bistrell, hoi lo an peskri bari soor kras. Latcho un kamlo hi lo.

⁵ Chapen dell lo kolen, kai djiwenn leha. An kek tsiro bistrell lo ko lab, hoi das lo lengre phurende.

⁶ Job sikras peskre menshende, har sorelo job hi, un das len i themma wawar menshendar, te wenn le lengre.

⁷ Job rikrell peskro lab, un lauter, hoi krell lo, hi tchatcho. Un mer nai rikrah men ap leskre laba.

⁸ Kal laba atchenna hako tsireske. Tchatcho hi le, un mer te rikras men ap lende.

⁹ O baro Dewel las peskre menshen win dran i tchilatche wasta, un kras lentsa win, te wenn le leskre menshe hako tsiro. Job kokres hi lengro Dewel. Baro hi lo!

¹⁰ Koon djiwell o baro Debleha, kowa lell goswepen. Gosewo hi hakeno, kai ap o baro Debleskre laba shunella. Te sharas les hako tsiro!