Debleskri gili 108 - O Debleskro Drom 2021 (Sinte)

O baro Dewel hi o sorleder pral kolende, kai leskre menshenge tchilatchepen krenn

¹ I gili o Davidestar.

² Miro Dewel, miro dji hi pale sorelo. Me kamau tuke te giwell un te bashrell, awa, kowa kamau me.

³ Bashrenn, tumer miri harfa un miri gitarra! Kau diwes kamau me o kham pre te djangrell.

⁴ Baro Dewel, me kamau tut te sharell, mank i menshende dran bud themma tuke gilja te giwell.

⁵ Tiro latchepen hi jaake baro, te djal lo pral o bolepen, un tiro tchatchepen jaake dur har i wolke nashenn.

⁶ Sike tiro barepen ap o bolepen, miro Dewel, un tiro railepen ap i tseli phub!

⁷ Ab ap mari rig tiro sorelo wasteha un le men, kolen tu kameh, win dran i tchilatche wasta! Shun, har dau ap tute gole!

⁸ O Dewel rakras an peskro kheer, kai job djiwell: “Me wom o sorleder”, dell lo gole i bachtjatar. “Me dau o foro Sichem mire menshende, un ninna i tala Sukkot.

⁹ O them Gilead hi miro, un o them Manasse hi miro. O them Efrajim hi miri sasterni stadi, un o them Juda hi kowa, koles penepaske hi.

¹⁰ O them Moab hi miro thopaskro tcharo. Ap o them Edom witsrau miro kirach. Pral i Filistarja dau wi-gole, te wom lengro rai.”

¹¹ Koon anell man an ko sorelo foro? Koon sikrell man o drom an o them Edom?

¹² Koon nai krell kowa, har tu kokres, mo Dewel, kai mukal men? Djah tu gar win mare lurdentsa an o kurepen?

¹³ Ab tu ap mari rig un le men win dran i tchilatche wasta! Te hi menshe ap mari rig, hi kowa tchitcheske un tchi moldo.

¹⁴ Maro Debleha krah mer baro koowa. Un job stakrell kolen khetne, kai jaake soreles ap mende djan.