2. Korintarja 9 - O Debleskro Drom 2021 (Sinte)

Lowe i patslenge

¹ Pral ko latchepen, hoi mer hunte kras i patslenge, hunte tchinap tumenge gar.

² Me djinau, tumer kamenn o tselo djijestar kol patslenge an o foro Jerusalem lowe khetne te tchiwell. Dran kowa sharom tumen pash kolende an o them Macedonia un penom: “Glan jek bersh lan kol phrala an o them Achaja lowe khetne.” Har jon kowa shunan, kaman bud lendar jaake te krell, har tumer kran.

³ Kanna bitchrau mare phralen pash tumende, te well tchatcho, hoi tumendar sharom an kau koowa, un te well lauter jaake kerdo, har tumendar penom.

⁴ Palle, ap ko diwes, kai wenn kolla dran o them Macedonia mantsa khetne pash tumende, hatsenn le lauter jaake har penom. Te hatsans le kowa gar jaake, hawi ladj wals kowa mange un tumenge ninna!

⁵ Doleske mangom kol phralen, te djan jon glan mende, un lenn kol lowe, hoi tumer khetne tchiwan. Jaake hunte tchiwenn tumer gar kol lowe sik khetne ap ko diwes, kai mer wah. Un kol lowe, hoi tumer denn, well o djijestar, un gar dran o boklepen.

O Dewel dell men latcho koowa, te das mer kowa dureder

⁶ Kowa hi jaake har pash i hacho: Koon tchiwell gar bud djob an i phub, kowa lell witar gar bud dran i phub win. Un koon tchiwell bud an i phub, kowa lell bud dran i phub win.

⁷ Hakeno hunte dell jaake bud lowe, har leskro dji leske penella. Les hunte khaitell kowa gar, hoi job das! Job dell kowa pestar un gar, har te kaman le les lestar. O Dewel kamell kol menshen, kai denn o djijestar.

⁸ O Dewel nai dell tumen jaake bud, kai hi tumen hako tsiro doha halauterestar, jaake te nai denn tumer i wawaren tchomone.

⁹ Palle rakrenn le tumendar, har an o Debleskro lab tardo hi: Job das bud i tchorwelende. Ko latchepen, hoi job kras, atchella hako tsiro.

¹⁰ O Dewel, kai dell o haches i djob, ninna o maro chapaske, kowa dell tumen ninna, un krell budeder dran kowa, hoi tumen hi, jaake te well bud latchepen dran kowa, hoi tumer krenna.

¹¹ Job dell tumen jaake bud, te nai denn ninna kolen, kai len tchi hi. Te lenn jon kowa, hoi mer anah lenge, palle parkrenn pen bud menshe pash o Debleste.

¹² Kowa, hoi kran tumer i tchorwele patslenge, hi lenge mishto. Un kowa hi gar lauter. Jon parkrenn pen pash o Debleste. Te parkrenn pen bud menshe pash o Debleste, hi kowa ninna bud moldo.

¹³ Koleske, hoi tumer lenge latches kran, sharenn le o Debles. Jon dikenn, kai shunenn tumer ap o latcho lab o Jesus Kristestar, un kai hi jon, ninna i tsele wawar patsle, tumenge phrala un phenja.

¹⁴ Te dikenn le, har baro o Debleskro latchepen mank tumende hi, mangenn le o Debles tumenge un kamenn tumentsa khetne te well.

¹⁵ Parkras men pash o Debleste! Job das men peskro baro kamlepen, kai hi jaake baro, te nai rakrah les gar win.