2. Korintarja 2 - O Debleskro Drom 2021 (Sinte)

¹ Kamom gar, te well tumenge ropaske. Doleske wom buder gar pash tumende.

² Me te krau, te well tumenge ropaske, palle hi mange kek koi, kai krell man pale bachtelo.

³ Doleske tchinom tumenge ko liil. Kamom gar, te rowap pral kolende, kai man bachteles hunte krans. Un me patsau soreles, te han tumer bachtele pral kowa, te nai krenna tumer man bachtelo.

⁴ Doleske tchinom tumenge ko liil bud ropah un traash an miro dji. Kamom gar, te dukrap tumen. Na-a, me kamom, te dikenn tumer, kai kamau tumen o tselo djijestar.

Awenn pale latches kolenge, kolen tumer i phagi dan!

⁵ Tumer djinenn, pash tumende hi jek, kai dukras tumen an o dji. Job dukras gar man. Na-a, job dukras bud tumendar. Me nai penau gar, te dukras job tumen halauteren.

⁶ Tumer dan les i phagi. Un kowa hi doha.

⁷ Kanna hunte bistrenn ko koowa, hoi job kras. Rakrenn latches leha, te well leske gar buder ropaske.

⁸ Me mangau tumen: Sikrenn leste, te kamenn les!

⁹ Ko liil tchinom tumenge ninna, te dikap, har shunenn ap mande an hako koowa.

¹⁰ Te bistrenn tumer o tchilatchepen, hoi o wawar ap tumende kras, palle bistrau me kowa ninna. Awa, te dals tchomone, hoi hunte bistroms me, palle bistrom me kowa tumenge. Kowa djinell o Jesus Kristo.

¹¹ Me kamau gar te taprell men o beng. Mer djinah mishto, hoi koles hi an leskro shero.

¹² Har wom me an o foro Troas, te penap kote o latcho lab o Jesus Kristestar, kras o Dewel i menshengre djia pre.

¹³ Miro phraal, o Tito, kamas ninna an kau foro te well. Har was lo gar, was man i daar, un me penom lenge: “Atchenn mo Debleha!” un djom mange an o them Macedonia.

O latcho lab o Jesusestar hi jaake har i shukar sungepen

¹⁴ Me parkrau man pash o Debleste, te dell lo men i soor, te djas ap o Jesuseskro drom. Khetne o Jesuseha ham hako tsiro sorleder har o tchilatchepen. Un kote, kai penah i menshenge o latcho lab o Jesusestar, hi kowa jaake, har te well i latcho sungepen pash bud menshende.

¹⁵ Te rakrah o latcho lab o Jesus Kristestar, hi o Dewel bachtelo pral kowa. Kowa hi leske har i shukar sungepen, hoi djal pash kolende, kai lenn o Debleskro djipen un ninna pash kolende, kai djan nashedo.

¹⁶ Kolenge, kai djan nashedo, hi kowa har i djungeli khand, hoi anell len an o merepen. Kolenge, kai lenn o Debleskro djipen, hi kowa i latcho sungepen, hoi anell len an o djipen. Kaja hi i bari budi. Koon nai krell kowa lauter mishto? Kek.

¹⁷ Bud rakepangre penenn o Debleskro lab, te lenn le i menshenge lowe lendar tele. Jaake ham mer gar. Mer penah o Debleskro lab tchitcheske. Kowa krah o Jesus Kristeske. Mare laba wenna o Deblestar. Un job shunell, hoi rakrah.