Markus 9 - O Evangelio Jezus Kristusester pala Markus 1912 (Sinte)

EJATO KAPITLO.

¹ Ta pala šob divesenge andes Jezus o Petruses, Jakobuses ta Johaneses paša leste ta gejes lenca kokeres paš i rik api baro brego.

² Pala vejeslo vaverčandes glana lende. Leskr kola vejena šuker, parnes her jib, keake našte kerelo kenk valkaro api phub parnes.

³ Pala vejen Elias o Mozesester; ta kale rakerden o Jezusester.

⁴ Pala andes Petrus o lab ta phendes api Jezuseste. Sikerpaskerrai, hi lačo, ta ham kai; me kamahas, ta kerahas drin tikne kherenge, tuke jek, o Mozeseste jek, ta o Eliaseste jek.

⁵ Ta job džandes gar, ho phendeslo, vel ta has len dar.

⁶ Pala vejes i felešnodi prala lende, ta drani felešnodi vejes i bašo ta phendes: Kava hi miro kamlo čavo; hunena apo leste!

⁷ Ta sik, ta dikhen len trujum, dikhen pen kenkes buter her o Jezus kokeres paša lende.

⁸ Her ta gejenle o bregester tele, phendeslo lenge, mo ta phenena kenkes ho ta dikhen pen tume, džin ta hi o dženenger‐čavo i mulender pre štardo.

⁹ Ta jon rikerden kava kova paša lende, ta phučen pen tele ketene, ho kava hi: džin ta hi lo i mulender preštardo.

¹⁰ Ta jon phučen les ta phenden: O livro‐sikermangerende phenena: Elias hunte džala sikerder?

¹¹ Job rakerdes ta phendes apo lende: Elias vela sikerder ta kerelo lauteres kome lačo; her hi nina i dženenger čaveste čindo, job štela but vri, ta hunte veles praserdino.

¹² Ta me phenau tumenge: Elias ta vejes kai hi lester čindo, ta jon kerden leha ho kamjen len.

¹³ Ta vejeslo lesker sikermangerender dikheslo but čel drumo lende, ta rakerden lenca o sikermangerende.

¹⁴ Keake sik, ta dikhes o celo čel Jezuses, štoken pen le, našenle kater, ta parkerden les.

¹⁵ Ta job phučes len: Hoveske čingerena tume vaverkend?

¹⁶ Pala rakerdes jek drani čeles ta phendes: Sikerpaskerrai me andom miro čavo paša tute, les hi i lalero mulo.

¹⁷ Ta kai tapereles ha, vicerelo les tele; job čungeralo, ta kniršelo lesker dandenge, ta vela nina sano. Te me phendom tire sikermangerende, ta traden pen les vri, jon ta naštena gar.

¹⁸ Pala rakerdeslo lenge ta phendes: Tume bipacepenenge! Her raha mo ta ačaues paša tumende? Her raha hunte hidžeraues kome tume? Anena les kate mande.

¹⁹ Ta jon anden les kote. Ta keake sik dikheslo les, grotldes pes o mulo; ta job pejes api phub ta vargltes pes lo čungeles.

²⁰ Pala phučeslo leskr dadeste: Her raha hi, ta gejes leske kova? Kava ta phendes: Siter i čavengerciriester.

²¹ But kopo vicerdeslo les ani jak ta ani pani, ta marenpen les. Ta kamehas tu, pala vehas džiskerpen mender, ta hilderve mender!

²² Jezus ta phendes apo leste: Ta našte pacehas tu! Kon paces, koles vela ha hilderdo.

²³ Ta sik khardes o dad i čavester, rondes ta phendes: Me pacaua, rai; hilder miro bipacapenes!

²⁴ Ta dikhes Jezus, ta našjes o čel ketene, preterdeslo i čikalo mules ta phendes apo leste: Tu korelo ta lalero mulo, me phenau tuke: dža drani lesker nikli, ta ve kome gar ani leske.

²⁵ Pala dejeslo godlo, grotltes peslo ta gejes vri, ta job has her mulo, keake ta phenden buteder: Job hi merdo.

²⁶ Jezus taperdes les paši vast, ta job štejes pre.

²⁷ Her ta gejeslo ani kher drin, phučen pen les kokeres: Hoske ta našte tradervehas men les gar vri?

²⁸ Ta job phendas apo lende: Kava kova našte ta vela drucha či traderdo her druchi priserpen.

²⁹ Ta jon gejen pen kater nikli ta vejena druchi Galilea; job kamjes gar, ta džanelales čomoni.

³⁰ Job sikerdes lesker sikermangerende ta phendes apo lende: o dženenger čavo vela ani vast o dženenge, ta drin dives pala lesker merepen vela preštardo.

³¹ Jon hajerden kava lab gar, ta daren pen len ta phučen les.

³² Ta jon gejena pala Kapernaum. Her ta hi len khere, phučeslo len: Hoveske rakerden tume apo drom?

³³ Jon ta phenden či; jon čingerden pen vaverkend api drom, komes hi o bareder tela lende.

³⁴ Pala bešeslo peske tele, khardes kola dešduienge ta phendes apo lende: Ta kamelo jek, ta hilo glanduno, pala velo palduno hakenende ta valeto hakenender.

³⁵ Ta job lejes i čavo, čides les maškeral tela lende, lejes les ani lesker musia, ta phendes apo lende:

³⁶ Kon ta anela jekes kala čavender ani miro lab pre, anelo man pre, anela gar man pre, foni koles, kai bičerdes man.

³⁷ Johanes ta phendes apo leste: Sikerpaskerrai, me dikhena jekes, kai trades ani tiro lab bengen vri, me čingdam les, vel ta kandelo men gar.

³⁸ Jezus ta phendes: Ma čingerena tume! Tela kenkes, kai kerele api miro lab i baro kovmaster, ta našte čingerelo man sik.

³⁹ Kones ta hi gar midžik apa tumen, kava hi tumender.

⁴⁰ Kones ta del tumen i khoro perdo pani ani miro labeste, doske vel ta hi tume o Christusester, čačo me phenau tumen, job našerela leskr plaiserpen gar.

⁴¹ Kones chojela jekes kala tiknender, kai pacen len amande, koleske vela fededer, ta bladen leske i jareskeri bar an leskr men, ta veles ani baro pani vicerdo.

⁴² Ta chojela tut tiri vast, pala kure li tele; hi tuke fededer, tu ta dža banges ani hamasker džiben drin, her ta hi tut dui vastenge un ta vehes ani bengesker jak drin, ani hamasker jak,

⁴³ kai ta merela lenger kermo gar, ta o jak džala gar vri.

⁴⁴ Ta chojela tut tiro piro, pala kure les tele; hi tuke fededer, tu ta džahas gar mišto ani hamasker džiben drin, her ta hi tut dui pirenge un ta veles ani bengesker jak vicerdo,

⁴⁵ ani hamasker jak, kai ta merelo lenger kermo gar, ta o jak džala gar vri.

⁴⁶ Ta chojela tut tiro jak, pala cerda les vri; hi tuke fededer tu džahas jek jakester ani devlesker them drin, her ta hi tut dui‐jakenge un ta veles ani bengesker jak vicerdo,

⁴⁷ kai ta merelo lenger kermo gar, ta o jak džala gar vri.

⁴⁸ Ta hakeno vela o jakeske londo, ta hako delapen vela i loneske londo.

⁴⁹ O lon hi lačo; ta našerela o lon leskr zorelopen, hoveske našte ta kereles tume zorelo? Hi tumen lon an tumende, ta rikervena tume lačopen tela vaverkend.