Markus 3 - O Evangelio Jezus Kristusester pala Markus 1912 (Sinte)

TRINTO KAPITLO.

¹ Ta job gejes ani khangeri. Kote has i dženo, koves has i čilačo vast.

² Jon dejene jak ape leste, ta kerelo les ani kurko sasto, ta phukeden len ape leste.

³ Job phendes apa kova dženes, kai has kole čilači vast: Ve kai ani maškeral.

⁴ Ta job phendes lenge: Hi mišto, ta kere lačo kova ta midžiko, ta hildervahas i džiben oder ta marahas?

⁵ Jon hin pokoni. Ta job dikhele chojemen ape lende, lesker dzi dukheslo prala lengr kašakopen, ta phendeslo o dženeske: Štaker tiro vast vri! Ta job štakerdes li vri, ta leskr vast has pale sasto.

⁶ O Farizeare gejen pen vri, ta rakerdenlen sik o dženenge Herodeseskro her ta maren pen les.

⁷ Jezus našes leskr sikermangerenca paše baro pani, ta but čel i Galilester ta Judester gejen

⁸ pen les pale ta nina o Jeruzalemester ta Idumester, ta i vaver rikester o Jordaneste, ta i themester i Tyrus ta Sidon vejes i baro hufka leske, her ta šunden lesker baro kovester.

⁹ Job phendes lesker sikermangerenge: Anen mange i bero vaške i čeleske džin ta vel me ger knoblmen.

¹⁰ Job kerdas but saste, keake hakeni her hin midžiko kova ana lenge, ta gejenle trucake lehe ta taperen‐le les.

¹¹ Ta dikhene kole čikele mule les, pejenle glana leste tele, dejene godli ta phendene: Tu hal i Devlesker čavo.

¹² Job preterdes len, te kerene les ger hajerdo.

¹³ Te job štejes api brego, ta khardeslo kolen kai kamjeslo, ta jon vejene.

¹⁴ Job lejes kole dešdui, ta has len paše leste, ta bičerelo len api rakerpen vri.

¹⁵ Job dejes lenge i zorlopen, ta tradenlen o bengen vri.

¹⁶ O Simoneste dejeslo o lab Petrus, ta Jakobus o čavo o Zebedeusester,

¹⁷ ta Johanes i phral Jakobusester dejes job o lab Boanerges,

¹⁸ kava kharde veradenger čave, ta Andreas, ta Filipus, ta Bartolomeus, ta Mateus, ta Tomas, ta Jakobus, o čavo o Alfeusester, ta Tadeus,

¹⁹ ta Simon o Kanara, ta Judas Iskariot, kova kai phukerdes apa leste.

²⁰ Her ta gejenle khere, has but džene ketene, keake ta chanele buter ger lengr maro.

²¹ Ta šunden kova lesker dai ta lesker phrala, gejenle vri, ta taperdenle les, ta phendenle: Job vejes narbelo.

²² Ta kole librenger sikerpangere, kai vejena o Jeruzalemender phendena: Les hi o beng Belzebul ana leste, ta drucho baro beng tradela kole vaver bengen vri.

²³ Job khardes lenge ketene, ta rakerdes lenge ani parnisende: Her ta tradela o beng i benges,

²⁴ ta hi i them an peske vaverčandes, keake našte ta ačela ger o them.

²⁵ Ta hi i kher an peske vaverčandes, keake našte ta ačela ger o kher.

²⁶ Ta štela o beng an peske vri, keake hilo nikli ta job ačelo buter ger, ta lesker kova hi vri.

²⁷ Kenk dženo našti velo ani kher o zorelester ta čorelo lesker kova, ta phandelo sikeder o zoreleste, pala našte čorelo leskr kher vri.

²⁸ Čačo me phenau tumenge: Hake došia vel o dženenger čavenge meklo, ta hake prasepenia kai kerdenle.

²⁹ Kova kai prasela o boldo muleste, kova vela kenk mekapen ani hamaskri, kova kerdas doš, kai ačela ha.

³⁰ (Jon phenden „les hi čikalo mulo“.)

³¹ Kana vejena leskr dai ta leskr phrala, ta ačena štejenle vri, ta bičerdenle lehe drin, ta vela job vri.

³² O čel bešdas drumo leste, ta phenden lehe: Dike, tiri dai ta tire phrala hin vri ta rodene tuke.

³³ Job phendas lenge: Kon hi miri dai, kon hin mire phrala?

³⁴ Ta job dikhes kola kai bešden leste trujum, ta phendeslo: Dike, ake miri dai ta mire phrala.

³⁵ Kava ta kerelo ho kamela o Devel, kava hi miro phral, miri phen, ta miri dai.