Obadja 1 - O Debleskro Lab 2024 (Sinte-Manouche)

O Debleskri rholi vell pral i Edomarya

¹ Kova hi, hoy o Obadya dikas. Kava penell o baro Devel, maro ray, pral o them Edom: O baro Devel bičras peskro bičepaskres pash i menshende an vavar themma. Oun mer shounam, har yob penas: Stenn pre! Mer djas an o kourepen oun kouras men i menshentsa an o them Edom!

² O baro Devel penell ap o them Edom: Me krau tout tiknes, yaake te dikell hako them ap i phoub tele ap toute.

³ Tiro zorelo foro hi tardo ap i bare barra, tou djiveh pral an i berge. Doleske phourdal tou tout pre. Dik, tiro dji rhorhras tout, har lo touke dren rakras: Kek nay vitsrell tout tele ap i phoub.

⁴ Te krals tou ninna tiro kheer dour pral ap i berga har i adlari, yaake te dikell kova vin, har te vals tiro kheer mashkral i bolepangre momlia, djiness, me vitsrau tout tele, penell o baro Devel.

⁵ Čorepangre venn rati pral toute oun čorenn tout vin, bis te hi le doha! Hoy ačell touke palle? Ninna kolla venna pral toute, kay i drake tele lenna. Touke moukenn le či pral!

⁶ An tiro tselo them rodenn le trouyel, oun hatsenn tiro tselo khatedo kouč koova!

⁷ Tire tsele mala tradenn tout dran tiro them vin! Kolen tou patsal, yon rhorhenn tout, oun perenn touke an o doumo. Kolla, kay tiro maro rhan, phoukrenn ap toute, oun tou hayveh les gar.

⁸ Me, o baro Devel penau: An ko tsiro lau i goseven an o them Edom krik. Oun ap i berge Esau djinell bouder kek, hoy te krell.

⁹ Oun i zorele kourepangre an o foro Teman lenn bari daar. Doleske vell hakeno ap i berge Esau maredo.

¹⁰ Tou kral djoungelo koova ap tiro phraleste, o Yakobeste! Doleske vell i ladj ap toute, oun tou vess yaake khetne stakedo, te stess bouder gar pre!

¹¹ Tou, Edom, hals koy pashel tardo, har djan i vi-themarya an Yerusalem dren, oun anan leskre lourden pandles krik, oun khelan koy pral, koon kones lengre menshendar lella. Tou hals har yek lendar!

¹² Tou, Edom, ma dik bouder tele ap tiro phraleste, o Youda, an ko tsiro, kay leske djoungeles djal! Ma sa bouder pral leskre čavende an ko tsiro, kay lenge ropaske hi! Ma rake yaake pre-phourdo an ko tsiro, kay yon darenna!

¹³ Ma dja dren an i voudya lengro forestar an ko tsiro, kay mire menshenge o ropaske hi! Ma dik tele ap lengri bibarht an ko tsiro, kay yon rovenna! Ma tape pal lengro koova, an ko tsiro, kay lenge yaake djoungeles djal!

¹⁴ Ma čip tout pash o drom khatedo tardo, kay i menshe nashenn penge, te dess len moulo! Ma phouke ap kolende, kay pral ačan an ko djoungelo tsiro!

O Israel vell vin lino dran i daar

¹⁵ O dives vell sik, kay vell miri rholi pral i tsele themma ap kay phoub, penell o baro Devel. Yaake har tou kral, yaake vell touke kerdo. Kova hoy tou kral, vell ap tiro shero pale.

¹⁶ T'mer menshe dran Youda, kay djivenn ap miri berga, t'menge penau: Yaake har piyan t'mer dran o khoro miri rholyatar, yaake hounte piyenn palle i tsele vavar menshe ap i phoub koy dran hako dives. Yon hounte čorenn o pipen an pende dren, bis te či bouder dren hi, oun kek lendar bouder koy hi. Palle vell, har te dans yon gar.

¹⁷ Ap i berga Sion djivenn kolla, kay vin lino van dran o merepen. Oun i berga hi pale o baro Debleske kokres. O Yakobeskre čave lenn o them pale penge, hoy lenge randedo vas.

¹⁸ Oun i menshe dran i khera Youda oun Israel venn har i yag. Oun o kheer Edom hi o phouss, hoy vell pre rhačedo, bis te či o kherestar Esau pral ačas. Kova penell o baro Devel.

¹⁹ Oun i menshe dran o kheer Youda, kolla kay djivenn an o them, kay o kham pralstounes hi, yon lenn kol berge dren, kay i Edomarya djivenn. Oun kolla, kay djivenn kote, kay o kham tele djal, yon lenn o them dren, kay i Filistarya djivenn. Oun kol vavar lenn i themma Efrayim oun Samaria penge dren. Oun o kheer Benyamin lell o them Gilead dren.

²⁰ Oun kolla, kay pandles krik anlo van dran Israel, yon lenn o them Kanaan dren bis pash o foro Zarpat. Oun kolla, kay dran o foro Yerusalem pandles an o foro Sefarad anlo van, yon lenn kol forya penge, kay an o them Youda kote hi, kay o kham pralstounes tardo hi.

²¹ Oun kolla ap i berga Sion, kay vin lino van dran o pandepen, len hi penepaske pral i Edomarya ap pengre berge. Oun o baro Devel hi o baro ray.