Louka 1 - O Debleskro Lab 2024 (Sinte-Manouche)

O Louka činell kava liil ap o Theofilo

¹ Lačo Theofilo, boud menshe činan an i liil, hoy o Devel mashkral mende kras.

² Yon činan pre, hoy kolla penan, kay kote pashel his oun kova lauter dikan.

³ Oun me ninna poučom i menshendar har kova lauter his, te djinap kova lauter mishto. Doleske kamau touke kova yaake pre te činell, har kova čačepah his.

⁴ Yaake hayveh tou, kay lauter čačo hi, hoy penan le touke.

O rashay Zakari

⁵ Ap kava tsiro, kay o Herodes o baro ray pral o them Youdea his, djivas i rashay. Kova his yek kol rashayendar, kay kharan pen pal o rashay Abia. Leskro lab his Zakari. Oun leskri romni kharas Elisabet. Yoy hi o Aroneskre menshendar

⁶ O Zakari oun i Elisabet his lačo an o Debleskre yaka. Oun yon shounan ap o Debleste, oun kran lauter, hoy an o Debleskro lab činlo his.

⁷ Len his kek čave. Yoy nay las kek. Oun yon douy his phouro.

^8-9 His i tsiro, kay boudran kol rashaya an o Debleskro baro kheer, kolendar o Zakari yek his. Oun har pash lende yaake hi, rodan le les vin, te djal yob an o Debleskro baro kheer, te rhačrell lo kasht o Debleske, hoy shoukar soungella.

¹⁰ Oun ap ko tsiro, har rhačras yob ko kasht, hoy shoukar soungella, his boud menshe vin tardo, oun mangan o Debles an.

¹¹ Ap yek kopo his o Debleskro bolepaskro tardo ap i čači rig pash o Debleskro sonakaskro bob, kay o Zakari o kasht rhačrell.

¹² Har o Zakari les dikas, las lo traash lestar.

¹³ Koy penas o bolepaskro ap leste: “Ma traash, Zakari! O Devel shounas tout, har tou mangal lestar, te vell t'men i ternepen. Tiri romni Elisabet lella i morsh čaves. Oun koles dess tou ko lab Yohanni.

¹⁴ Oun tiro dji stella i barhtyatar. Oun boud menshe venna barhteles pral ko ternepen.

¹⁵ Oun yob vella bares glan o Debleskre yaka. Mool oun vavar zorelo pipen piyell yob gar. Oun har yob gomme gar boldo hi, hi lo pherdo Debleskro Dourho.

¹⁶ Oun yob anell boud menshen an Israel pash o Debleste.

¹⁷ Oun yob hi pherdo Debleskri zoor yaake har o Eliya, oun yob krell i drom pre o Debleske. Oun yob krella, te lenn i dada pale i dji pengre čavenge. Oun kolla, kay shounan gar ap o Debleste, kolen anell yob pale ap o čačo drom. Oun yaake krell lo, te hi i menshen djia, kay pre hi lengro Debleske.”

¹⁸ O Zakari penas ap o bolepaskro: “Har nay djinau me, kay tiro čačo hi? Me hom i phouro morsh. Oun miri romni hi ninna phouro.”

¹⁹ O bolepaskro penas ap leste: “Me hom o Gabriel, oun me hom glan o Debleste tardo. O Devel bičras man pash toute, te penap touke kova.

²⁰ Ap o čačo tsiro vell kova yaake, har touke penom. Tou patsal mire laba gar, oun doleske lell o Devel tiro rakepen yaake rah krik, bis te vell ko dives, kay kova lauter vella.”

²¹ Oun i menshe dikan ap o voudar an o Debleskro baro kheer, oun djinan gar, hoske o Zakari yaake rah an o Debleskro baro kheer ačella.

²² Oun har yob kote vin vas, nay rakras lo bouder gar. Yob hadas peskro vast, te sikrell lo lende, te nay rakrell yob bouder gar. Koy pre dikan i menshe, kay o Devel rakras leha an o Debleskro baro kheer.

²³ Oun har kol divessa trouyel djan, kay yob an o Debleskro baro kheer boudras, djas lo khere.

²⁴ Oun palle vas leskri romni Elisabet an vavar koova, oun khatras pes panč čon glan i menshengre yaka. Oun yoy penas:

²⁵ “O Devel dikas lačes ap mande oun kras, te vell man i ternepen ap ko tsiro, har yob kamas, oun las miri ladj mandar krik.”

I Maria

^26-27 Ap ko tsiro har i Elisabet o shobto čon an vavar koova his, bičras o Devel o bolepaskres, o Gabriyeles, pash i terni čate. Lakro lab his Maria. Yoy djivas an o foro Nazaret. Kova hi i foro an o them Galilea. Oun kolakro pirno kharas Yosef. O Yosef his o Davideskre menshendar.

²⁸ Oun o Gabriel vas pash late an o kheer oun penas: “Lačo dives, Maria! O Devel hi touha! Yob dikas lačes ap toute.”

²⁹ Yoy tapras i daar, har yob yaake rakras, oun penas peske: “Hoy penell yob koy?”

³⁰ Oun o bolepaskro penas ap late: “Ma traash, Maria! O Devel hi touke lačo.

³¹ Shoun, tou veh an vavar koova, oun leh i čaves. Koles dess tou o lab Yezous.

³² Kova vell i baro ray. Yob vell kharedo Debleskro čavo. Oun o Devel krell lestar i baro ray pral Israel, yaake har yek leskre phourendar, o David, o baro ray his.

³³ Oun yob ačell baro ray pral o Yakobeskre menshende hako tsiro. Oun les hi penepaske pral lauter oun hakeneste. Kova ačell yaake hako tsireske.”

³⁴ Koy penas i Maria ap o bolepaskro: “Har djal kova? Man hi kek morsh.”

³⁵ O bolepaskro penas ap late: “O Debleskro Dourho oun leskri zoor vell pral toute. Doleske vell o ternepen o Deblestar oun vell Debleskro čavo kharedo.

³⁶ Shoun, i Elisabet, kay tire menshendar hi, hi an vavar koova an o shobto čon. Yoy hi phouri oun latar vell penlo, kay lell li nay kek čave.

³⁷ O Devel nay krell halauter.”

³⁸ Koy penas i Maria: “Me kamau o Debleske koy te vell. Lauter te vell yaake, har tou penal.” Koy djas yob peske.

I Maria djal pash i Elisabet

³⁹ Pal i tikno tsiro djas i Maria yaake sik har djala an i foro an o pralstouno them Youdea.

⁴⁰ Oun yoy djas an o Zakareskro kheer, oun penas: “Lačo dives, Elisabet!”

⁴¹ Har i Elisabet kova shounas, stas o ternepen an late. Oun i Elisabet vas pherdo Debleskro Dourho,

⁴² oun das bares gole: “Sharedi veh tou mashkral i tsele djouvyende, oun sharedo vell o ternepen an toute!

⁴³ Har djal kova, te vell koy day miro rayestar pash mande?

⁴⁴ Har me tout shounom, stas o ternepen i barhtyatar an mande.

⁴⁵ Barhteli hal tou! Tou patsal, te vell kova yaake, hoy o Devel touke penas.”

I Maria sharell o Debles

⁴⁶ Oun i Maria penas: “Me sharau mo Debles.

⁴⁷ Oun miro dji dell gole i barhtyatar pral mo Debleste. Yob hi ap miri rig.

⁴⁸ Me hom gar moldo, te dikas o Devel yaake lačes ap mande. Oun kanna sharenn man i tsele menshe. Oun lengre čave penenna mandar, kay o Devel man barhteles kras.

⁴⁹ Baro koova kras yob ap mande. Les hi i tseli zoor, oun leskro lab hi bareder har hako vavar lab.

⁵⁰ Yob kras peskro dji pre kol phourenge oun kolengre čavenge, lauterenge, kay shounenn ap leste, oun darenn lestar.

⁵¹ Oun yob hadas peskri zoreli moussi, oun tradas kolen krik, kay kran pen kokres bares.

⁵² Yob las i zoor i bare rayendar krik, te vell len bouder či penepaske, oun hadas i tiknen, te venn le baro.

⁵³ Kolen, kay bok his, das yob te rhal. Oun kol bravelen bičras lo krik. Oun yon nay lan či peha.

⁵⁴ Oun yob bistras gar peskro boudepaskres, o Israel, oun kras peskro dji leske pre,

⁵⁵ yaake har penas lo mare phourenge, o Abrahameske oun leskre čavenge, te vell lo lenge lačo hako tsireske.”

⁵⁶ I Maria ačas triin čon pash i Elisabet. Oun palle djas li khere.

O Yohanni vella boldo

⁵⁷ Oun ko tsiro vas, kay las i Elisabet i ternepen. Oun kova his i čavo.

⁵⁸ Lakre menshe oun kolla, kay djivan troul late, shounan kova, oun van barhteles lah pral ko baro lačepen, hoy o Devel kras ap late.

⁵⁹ Pal orhta divessa van le, te činenn le o ternepen ap o mass. Oun yon kaman les ko lab Zakari te dell, yaake har leskro dad kharella.

⁶⁰ Leskri day penas: “Na-a! Yob hounte lell ko lab Yohanni.”

⁶¹ Penan le ap late: “Kek tire menshendar kharell yaake.”

⁶² Oun yon sikran i vastentsa ap leskro dad, te penell kova, har ko ternepen hounte kharell.

⁶³ Oun yob kamas, te anenn le leske čomone, kay nay činas yob pre. Oun yob činas: “Yob kharell Yohanni.” Koy kran lauter bare yaka.

⁶⁴ Ap yek kopo nay rakras o Zakari pale, oun sharas o Debles.

⁶⁵ Oun i traash vas ap lauterende, kay troul lende djivan. Oun i tsele menshe, hoy an o pralstouno them Youdea djivan, rakran pral kova.

⁶⁶ Oun lauterenge djas kova an o dji, kay kova shounan. Oun yon penan: “Hoy vell dran kava ternepen?” Oun lauter patsan, kay o Debleskri zoor ap o čaveste čiddo hi.

O Zakari sharell o Debles

⁶⁷ Oun leskro dad Zakari vas pherdo Debleskro Dourho, oun penas kolla laba, hoy o Devel an leste čivas:

⁶⁸ “Sharas o baro Debles! Yob hi o Israeleskro Devel! Yob vas pash mende, oun las men dran mari bibarht vin.

⁶⁹ Yob bičras menge yek zoreles, te lell yob men dran o čilačepen vin. Oun kava vella o Davideskre menshendar.

⁷⁰ Glan i rah tsiro penan i Debleskre rakepangre,

⁷¹ te lell men o Devel dran i vasta kolendar vin, kay kamenn men te marell, ava, te lell lo men dran i vasta kolendar vin, kay men gar kamenna.

⁷² Les his i baro dji mare phourenge oun bistras gar kova, hoy yob lentsa an o phouro tsiro vin kras oun peskro vast pre das.

⁷³ Glan maro dadeste, o Abrahameste, das yob pes sovel,

⁷⁴ te lell lo men dran i čilače vasta vin, te boudrah nay leske, oun trashah bouder gar,

⁷⁵ yaake te djivas mer leske i djoudjo oun lačo djiyeha yaake rah, har djivah.

⁷⁶ Oun tou miro čavo, tou veh ninna i Debleskro rakepaskro. Oun tou djah glan o Debleste, oun kreh leske i drom pre, te vell lo nay pash i menshende.

⁷⁷ Leskre menshende sikreh tou, har nay vell lengri doosh krik lino, yaake te djan le gar nashedo.

⁷⁸ Maro Debles hi i baro dji menge. Leskro kamlepen vell pash mende. Kova hi har o kham, hoy djal pre ap o bolepen,

⁷⁹ oun vell diklo kolendar, kay hi len traash o merepastar. Kay bari momeli anell men ap o drom, kay vella o Debleskri barht ap mende.”

⁸⁰ O Yohanni vas baro, oun hayvas hako dives feteder, hoy o Devel kamella. Oun yob djivas an o moulo them yaake rah, bis te vas ko dives, kay yob glan i menshende an Israel rakras.