Jeremia 8 - O Debleskro Lab 2024 (Sinte-Manouche)

¹ O baro Devel penell: An ko tsiro venn kol kokale kol bare rayendar dran o them Youda kote vin lino, kay le paskedo hi, ninna kol kokale kol pralstunendar oun rashayendar, kol kokale o Debleskre rakepangrendar, oun kol kokale kol menshendar an Yerusalem.

² Oun kol kokale venn koy trouyel vitsedo glan o kham oun o čon oun i tsele bolepangre momlia, kolen kaman kol menshe, oun mangan len an, oun nashan lenge pal. Kolendar poučan yon oun sharan len. Kol kokale venn gar pre hadedo oun venn gar paskedo. Yon venn foul i phoubyake.

³ Oun lauter kolla, kay pral ačan kal čilače menshendar, kay djivenn kote, kay me len tradom, lenge vals o merepen feteder har o djipen. Kova penell o baro Devel, ko ray pral o bolepen oun i phoub.

I menshe nashenn an pengri bibarht

⁴ Ap mande penas lo: Pen ap lende: Kova penell o baro Devel: Te perell yek, stell yob sik pale pre. Te nashrell pes yek, rissrell yob sik pale trouyel.

⁵ Hoske nashrenn pen kal menshe an o foro Yerusalem pale te pale, oun rissrenn gar trouyel? Yon ačenn pash kol rhorhene deblende, oun kamenn gar palpale pash mande te vell.

⁶ Me dikau oun shounau, kay rakrenn yon gar o čačepen. Koy hi kek, kay khaytell les havo čilačepen yob kras. Kek poučella: Hoy krom me? Hakeno nashella doureder ap peskro drom, har i gray an o kourepen.

⁷ O storko tel o bolepen djinell peskro tsiro, oun kol vavar čirkle rikrenn o tsiro dren, kay venn le pale.

⁸ Har nay penenn t'mer: Mer ham gosevo. Men hi o baro Debleskro lab pash mende. Rhorhepen hi kova lauter, hoy kol sikepangre dran kova krenna.

⁹ Kol goseve vitsran o Debleskro lab pal pende. Havo gosvepen ačell lenge? O dives vell, kay vell ladj oun daar pral lende. Yon venn tapedo oun pandles krik anlo.

¹⁰ Lengre djouvyen dau vavar morshende. Oun lengre kotya them dau kolende, kay tradan len krik. Halauter, tikne oun bare, rhorhenna, te venn le bravelo. Ninna i Debleskre rakepangre oun rashaya rhorhenn i menshen,

¹¹ oun krenn yaake, har te vans kol douka mire menshendar gar yaake pharo. Yon penenna: Lauter hi mishto, lauter hi mishto, ninna te hi či mishto.

¹² Yon hounte ladjans koleske hoy yon kran, koveha man rhoyran. Kova krenn le gar. Yon ladjenn gar. Hoy ladj hi, djinenn le gar. Doleske venn yon maredo khetne kol vavarentsa. Te vau me, oun dau len i phagi, hounte perenn le, penell o baro Devel.

¹³ Te kamau pash mire menshende lačepen te hatsell, hom har i harho, kay kamell drake oun fayge dren te lell, oun kay hatsell kek drake oun kek fayge ap i rouka. Ninna kol patria peran tele, penell o baro Devel. Doleske dom kal menshen pre. Vavar menshe lenn penge lengro them.

¹⁴ Hoske ham mer kay trouyel beshdo? [poučenn i menshe dran Youda.] Mer vas khetne, te djas mer an kol zorele forya, te vas koy maredo! Mer moukam o baro Debles, maro rayes. Doleske kamell lo maro merepen, oun dell men savo pani te piyell, hoy marell men.

¹⁵ Mer patsam, kay vell lauter mishto. Či vas mishto! Mer kamams, te vell i tsiro, kay kova, hoy an mende nasselo hi, sasto vals. Kova vas gar. I daar vas.

¹⁶ Kolla, kay kamenn te kourenn pen mentsa, hi pash o foro Dan tardo. Foun kotar shounah koy gole lengre grayendar. O tselo them trissell koy golyatar hoy i graya denn. Yon venna oun rhan ko tselo them pre, lauter, hoy ap ko them hi, kol forya oun lauter, hoy koy dren djivella.

¹⁷ Me, o baro Devel penau: Me bičrau čilače sapa pash t'mende, save, kay anenn o merepen. Kolen nay rikrell kek pre. Kolla dandrenn t'men.

O Yeremia rovell troul peskre menshende

¹⁸ Miro dji phagell. Man hi ropaske. Hoy nay krell man pale zorelo?

¹⁹ Dran o tselo them shounau me, har denn mire menshe gole. Kamell o baro Devel bouder gar o Devel an Sion te vell? Hi o fores Sion bouder kek baro ray? Hoske kran yon man yaake rhoyedo [penell o baro Devel], har mangan le pengre figuren oun rhorhene deblen an, kay kekeske ap i rig venna?

²⁰ O tsiro hi trouyel, kay o djob dren anlo vell. O niyal hi trouyel, oun kek vas, kay men dran i bibarht vin las.

²¹ Mire menshe phagan khetne. Doleske rovell miro dji. Mange hi, har te merap, oun djinau gar, hoy te krap.

²² Hi an o them Gilead kek doukepaskro djet? Hi kek dramaskro koy? Hoske dell kek sastepen mire menshenge?

²³ Ah, te vals man doha pani an miro shero, oun mire yaka te vans har i kvella, te rovap nay ap o dives oun ap i rati, pral kolende mire menshendar, kay van moulo dino!