Jeremia 5 - O Debleskro Lab 2024 (Sinte-Manouche)

Kek djivell an o čačepen

¹ Djan kol dromma an Yerusalem pral oun tele! Krenn t'mare yaka pre oun rodenn ap kol dromma o forestar! Te hatsenn yekes, kay djivell an o čačepen, oun rikrell pes ap o Debleste, palle bistrau i doosh o tselo forestar.

² Ninna te denn yon pen sovel pash o djido Debleste, hi kova rhorhepen.

³ Baro Devel, tire yaka dikenn ap i djipen an o čačepen. Tou dal len i phagi. – Yon hayvenn kova gar. Tou kral len paash moulo. – Oun yon ačan, har yon hi. Yon djan pal pengro shero. oun kamenn gar pengro čilačo drom te moukell.

⁴ Me penom mange: Kolla hi čorvele menshe, kay či djinenna, oun prindjrenn gar o Debleskro drom oun leskro čačepen.

⁵ Me kamau pash i pralstunende te djal, te rakrap lentsa. Kolla djinenn o Debleskro drom oun nay penenn mange, hoy an i yaka lengro Deblestar mishto hi. Palle hayvom: Ninna kolla kaman gar, te vell yob lengro ray, oun kaman gar ap leste te shounell.

⁶ Doleske venna leve dran o veesh oun marenn len; divye djoukle dran o divyo oun trouk them dandrenn len an kotya, oun bare divye margodje lourenn glan lengre forya. Hakeno, koon vin vella, vella an kotya dandedo. Lengri doosh hi boud oun phari. Boud kope djan le mandar krik.

⁷ Hoske bistrap i doosh mire menshendar? Yon djan mandar krik, oun denn pen sovel pash koleste, kay kek devel hi. Har me len čalo krom, phagan le mantsa, oun djan an i loubyengro kheer.

⁸ Hakenes hi rhanč ap kol vavareskri romyate har i gray, kay divyo hi pal haki djouvyate.

⁹ Oun me hounte dap len kek phagi? penell o baro Devel, oun dap have menshen har kalla gar pale, hoy yon kran?

¹⁰ Nashenn pre, kay lengre drakengre rouka tardo hi, oun krenn len paash! Ma tserdenn i tsele bourra vin! Moukenn čomone tardo! Tserdenn i kashta i drakentsa vin, kolla hi gar mange.

¹¹ Yon sikran mange o doumo, penell o baro Devel, kol menshe an Israel oun kol menshe an Youda.

¹² Yon penan rhorhepen pral o baro Debleste, oun penan: Kova krell yob gar! Yaake djoungelo djal menge gar! Kourepen oun bok vell gar pash mende.

¹³ O Debleskre rakepangre rakrenn, hoy či moldo hi. Hoy yon penan, vell gar o Deblestar. Mou perell ap lende, hoy le penan.

¹⁴ Doleske penell o baro Devel, ko ray pral o bolepen oun i phoub: Savo koova rakrenn t'mer! Doleske kamau me mire laba an tiro mouy, Yeremia, har yag te krell, oun i menshen har kasht rhačepaske, oun koy yag rhal kol kashta pre.

¹⁵ Pen kol menshenge an Israel: Me anau menshen foun doural pash t'mende, penell o baro Devel, menshe, kolengro rakepen, oun hoy yon penenna, hayvenn t'mer gar. I phouri natsyona hi le. Oun len hi bari zoor.

¹⁶ Lengre fayle anenn o merepen. Yon hi halauter čače morsha, kay hayvenn pen te kourell.

¹⁷ Yon rhan tiro djob oun tiro maro, tire čaven, tire čen, tire bakren oun groumyen, tire drake, tire faygetikre rouka. T'mer patsenn, te djal t'menge či an t'mare zorele forya. Kolen lenn yon t'mendar o rhareha krik.

¹⁸ Me, o baro Devel, kamau mire menshen gar lauteren te marell an ko tsiro.

¹⁹ Oun te poučenn yon: Hoske krell maro baro Devel kova menge lauter?, hounte peness tou lenge: Yaake har t'mer mandar krik djan, oun van vavar deblenge koy an t'maro them, yaake hounte boudrenn t'mer vavar menshenge an i them, kay gar t'maro hi.

²⁰ O baro Devel penas ap mande: Pen ap kol menshende dran o kheer Yakob, oun ap kol menshende an o them Youda:

²¹ Shounenn kay, t'mer menshe, kay t'men či an o shero hi, kay len yaka hi, oun dikenn či, kay len kanda hi oun shounenn či!

²² Hi t'men kek traash mandar, poučell o baro Devel. Trissenn t'mer gar glan mande? Me krom, te ačell o baro pani ap yek platsa, oun čivom santa koy glan. Koy hounte ačell o pani hako tsiro, oun doureder nay nashell lo gar. Ninna te vell ko pani yaake divyo, oun djal pral oun tele, nay djal lo gar doureder.

²³ Kal menshe djan pal lengro shero, oun kamenn gar te shounell. Yon djan mandar krik oun djan pengro drom.

²⁴ An pengro dji penenn le gar: Mer te dikas pre ap maro baro Debleste! Yob bičrell menge o brishin an o čačo tsiro, brishin an o vend oun brishin an i niyal, te vell men o djob rhapaske an ko čačo tsiro.

²⁵ T'mari doosh, hoy ap t'mende anan, oun ko čilačepen, hoy krenna, rikras ko lačepen t'mendar pale, yaake te van phare tsirya ap t'mende.

²⁶ O baro Devel penella: Mashkral mire menshende hi čilače menshe, kay lourenn ap vavarende, te taprenn le len, har kolla, kay tapenn i čirklen dren,

²⁷ oun kolen čirklengre khera pherde čirkle hi. Yaake hi lengre khera pherdo čoredo koova. Doleske van yon baro oun bravelo.

²⁸ Thoullo oun pesso hi le, oun moukenn gar tele te krenn le čilačepen. O čačepen lenn le gar an o vast, te lenn kolendar pengro čačepen, kay čorvelo hi, ninna kol čavendar, kay len kek dad bouder hi.

²⁹ Moukap me len kova te krell oun penap či koy pre, penell o baro Devel. Dap me save menshen kek phagi?

³⁰ An kava them djal boud čilačepen oun djoungelo koova.

³¹ O Debleskre rakepangre rakrenn rhorhepen, oun kol rashaya rodenn penge ko feteder vin, oun mire menshe kamenn kova yaake. Hoy kamenn t'mer te krell, te hi t'maro tsiro trouyel?