Hiob 8 - O Debleskro Lab 2024 (Sinte-Manouche)

O Bildad: Leskro ersto rakepen

¹ O Bildad dran o them Shoua penas koy pre:

² Har rah gomme kameh tou sau koova vin rakrell? Kova, hoy rakreh hi har i zorelo phourdepen.

³ Patseh čačepah, te krell o zorelo Devel gar, hoy mishto oun čačo hi? Patseh, te rissrell lo peskre čačepaskre laba trouyel?

⁴ Tire čave kran, hoy čilačes his glan leskre yaka. Doleske das lo len pengri phagi.

⁵ Te rodeh tou o Debles tiro tselo djiyeha, oun mangeh ropah o zorelo Deblestar, te vell lo touke pale lačes,

⁶ oun djiveh i djoudjo djipen an o čačepen, palle stell lo touke pre, oun moukell les touke oun tiri familyake pale mishto te djal, yaake har čačo hi.

⁷ Kova, hoy tout glan kova his, vell touke tiknes glan, te dikeh ko baro bravlepen, hoy dell tout o Devel an ko tsiro, hoy vella.

⁸ Dik ap kova, hoy djinan i menshe an o phouro tsiro! De yak ap kova, hoy hatsan mare phoure vin!

⁹ Hi yaake har te vams boldo taysar. Mer djinah či. Maro tsiro, kay ham ap kay phoub, hi tikno har i souni.

¹⁰ Tire phoure nay sikrenn tout, hoy le vin hatsan, oun hoy yon an pengro djipen dikan:

¹¹ I shilftikro khass nay vell kokres kote baro, kay sapeno hi. Panyeskro zenlepen nay djal gar kote pre, kay kek pani hi.

¹² Te hi lo gomme zenelo oun gar bares doha, te vell lo tele činlo, marell lo sikeder tele har ko vavar zenlepen, te hi les kek pani.

¹³ Yaake djal hakeneske, kay o Debles bistrella. Kova, kay gar o Debleha djivell, koleske ačell či, hoy dell les pale nevi zoor.

¹⁴ Kova, hoy kamell lo te vell, kova vell gar. Ap koleste yob pes rikrell, kova hi yaake har i sano thab, hoy i spinna tserdell.

¹⁵ Rikrell lo pes ap peskro kheer, phagell kova khetne. Rikrell lo pes ap kova, hoy les hi, ačell kova gar.

¹⁶ I mensho kek Debleha hi har zenlepen, koles doha pani hi, glan te djal o kham pre, oun hoy bourhles vell, oun djal pral i tseli baar.

¹⁷ Leskre draba tserdenn pen pral barra, oun rikrenn pen zoreles ap lende.

¹⁸ Te tserdell yek les vin, djinell bouder kek, kay lo tardo his.

¹⁹ Kaya hi leskri tseli barht an peskro djipen. Oun ap leskri platsa djan pale vavar pre.

²⁰ Penau touke, o Devel vitsrell kolen gar pestar, kay an o čačepen djivenn. Oun yob rikrell gar i čilačen pash o vast.

²¹ Yob krell, te nay saneh pale, oun deh gole i barhtyatar.

²² Kolla, kay kamenn touke čilačepen te krell, hounte ladjenn. Oun i khera i čilačendar ačenn gar tardo.