Debleskri gili 90 - O Debleskro Lab 2024 (Sinte-Manouche)

O Devel ačell hako tsiro, o mensho ačell gar

1 O mangepen o Mosestar, ko Debleskro morshestar.

¹ O mangepen o Mosestar, ko Debleskro morshestar. Baro Devel, maro ray, tou hal kova, pash koleste nay vah oun khere ham.

² Glan i berge kerdo van, oun tou i phoub kral, hals tou, o Devel, koy. Oun tou ačeh hake tsirya.

³ Tou penell menge: “Avenn pale, t'mer menshe!” Oun moukeh men pale čik te vell.

⁴ Yek zero bersha hi pash toute har yek dives, har ko dives, hoy taysar his, oun bouder gar koy hi, oun har i tikno tsiro an i rat.

⁵ Har i lengsto pani sik doureder nashell, yaake moukeh mare divessa doureder te nashell. Maro djipen hi tikno har i sopen. Mer ham har i zenlepen, hoy taysarlakro dran i phoub vell,

⁶ bares vell oun shoukar hi, oun rati tele merell oun trouk vell.

⁷ Dran tiri rholi merah yaake sik. Tiri rholi khossell men krik.

⁸ Maro čilačo koova hoy kram, čival tou glan toute tardo. Mari khatedi doosh čakreh tou pre.

⁹ Dran tiri rholi djan mare divessa čičeske trouyel. Mare bersha djan yaake sik har te phourdell yek o dourho vin.

¹⁰ Maro djipen hi 70 (efta-deesh) bersha, te hi boud, 80 (orhta-deesh) bersha. Oun kova, hoy menge shoukar his, hi či har boudi oun pharepen. Oun sikeder har sik hi lauter trouyel.

¹¹ Koon patsell, te nay vell tiri rholi yaake baro? Oun koon darell tiri rholyatar?

¹² Sike men, har sik maro djipen trouyel hi, te vas mer gosevo.

¹³ Baro Devel, har rah kameh te rhoyreh tout ap mende? Dik pale lačes ap mende, tire boudepangre!

¹⁴ Haki tsalla kre maro djipen pherdo tiro lačepen! Palle sharah tout oun givah touke gilya yaake rah har djivah.

¹⁵ I rah tsiro hams tele rikedo. De men kanna yaake boud barhtele bersha, har hams an i bibarht.

¹⁶ Mer tire boudepangre kamah te dikas o baro koova, hoy tou kreh. Mouk mare čaven tiro raylepen te dikell!

¹⁷ Tou ray, maro Devel, dik lačes ap mende, oun čip tiri barht ap kova, hoy mare vastentsa krah. Ava, mouk mari boudi mishto te djal!