Debleskri gili 65 - O Debleskro Lab 2024 (Sinte-Manouche)

O Debleskro lačepen hi baro

¹ I gili o rayeske pral i gipangre. Kay gili kras o David.

² Tou, Devel, kay djiveh ap i berga Sion, tou hal moldo, te sharas tout, oun rikras mare sobya, hoy touke dam.

³ Tou shouneh, hoy toutar mangah. Doleske venn i tsele menshe pash toute.

⁴ Ko čilačepen, hoy krom, hi phares ap mande čiddo. Tou hal kova, kay i doosh krik lell.

⁵ Har barhtelo hi kova, koles tou touke vin rodal, oun moukeh les pash toute te vell, te djivell lo ap i platsa glan tiro kheer. Kova vell čalo o lačepastar an tiro raylo kheer, kay tou djiveh.

⁶ Tou rakreh mentsa dran baro koova, hoy tou kreh an tiri zoor oun an tiro čačepen. Tou, Devel, leh men vin dran o čilačepen. Ap toute dikenn i menshe ap i tseli phoub. Ninna kolla dikenn pal toute, kay djivenn pash i bare panya, hoy yaake dour krik hi.

⁷ Tiri zoryah čival tou i berge zoreles ap i phoub, oun čival tiri bari zoor troul toute har i ripen.

⁸ Tou peneh ap o divyo pani: “Mouk tele”, oun ap o pani, hoy dour pre djal: “Čip tout”, oun ap koy divyi gole, hoy i menshe an vavar themma krenna: “Ač kanna!”

⁹ Oun i menshenge ap i tseli phoub ačell o rakepen krik glan ko baro koova, hoy tou kral. Kotar, kay o kham pre djal bis kote, kay lo tele djal, moukeh tou halauteren te sal oun barhteles te vell.

¹⁰ Tou djineh, hoy o themes hounte vell, oun deh yak, te vell les doha pani, oun kreh les braveles. Miro Devel, tout hi hako tsiro doha pani. Tou moukeh boud djob bares te vell i menshenge.

¹¹ Koy harhetikri phoub deh tou doha te piyell, oun kreh i phoub sapeno, oun deh brishin, te vell lauter bares.

¹² Tou deh boud lačo koova oun kreh, te vell o bersh i lačo bersh. Kote kay tou brishin dal, vell yaake boud lačo koova vin, te hi boudeder har doha koy.

¹³ Kote, kay i bakre djan, hi lauter pherdo zenlepen, oun ap i berge shounah khelepen oun bashepen.

¹⁴ O pralstouno them hi pherdo bakre. Oun ap o telstouno them hi o djob tardo pesso oun thoullo. Oun lauter stenn oun givenn.