Debleskri gili 116 - O Debleskro Lab 2024 (Sinte-Manouche)

Yek parkrell pes, koles o Devel dran o merepen vin las

¹ Me kamau o baro Debles o djiyestar, yob shounas man, har rovom me ap leste.

² Leskro kand hi mange pre. Doleske rakrau leha yaake rah har djivau.

³ O merepen pandas man an peskre shelle. Djinom bouder gar dren oun vin, yaake baro his miri daar te hounte meroms oun djoms pash i moulende.

⁴ Kote dom gole ap o baro Debleste: “Me mangau tout, baro Devel, le miro djipen vin dran o merepen!”

⁵ O baro Devel hi lačo oun čačo, oun o djiyestar kamlo hi maro Devel.

⁶ O baro Devel dell yak ap kolende, kay nay denn gar kokres ap pende yak. Har his man kek zoor, vas lo mange ap i rig.

⁷ Me penau ap miro dji: “Ma dare bouder! O baro Devel his lačo ap toute.”

⁸ Tou lal man vin dran o merepen. Mire sva khossal tou, oun ap mire herya dal yak, te perap gar.

⁹ Yaake djivau glan toute kate ap kay phoub, kay i menshe djide hi.

¹⁰ Me patsom o Debles, ninna te penom: “Man hi kek zoor bouder.”

¹¹ Homs yaake phagedo, te penom: “I tsele menshe hi rhorhene.”

¹² Har nay krau me kova pale mishto miro baro Debleske, hoy yob lauter mange kras?

¹³ Me anau les i khoro mool, te parkrap man pash leste, kay las lo man vin dran o merepen.

¹⁴ Glan peskre tsele menshende anau o baro Debleske kova, hoy dom man sovel glan leste.

¹⁵ O baro Devel dikell i doukentsa ap o merepen peskre menshendar.

¹⁶ Ah, baro Devel, me hom yek kolendar, kay touke boudrenn. Ava, tiro boudepaskro hom oun boudrau touke har miri day kras. Tou kral i shelle pre, hoy pandan man.

¹⁷ Pash toute kamau me man te parkrell, oun tout an-mangell.

¹⁸ Glan tire tsele menshende anau touke, hoy dom man sovel glan toute,

¹⁹ oun dau les toute kote ap i platsa glan tiro kheer an o foro Yerusalem. Sharedo vell o baro Devel!