2. Mose 37 - O Debleskro Lab 2024 (Sinte-Manouche)

O sonakaskro morhton

¹ Oun o Bezalel kras ko morhton dran akatstikro kasht, 125 (sheel-te-biish-te-panč) centimetarya lengsto, oun 75 (efta-desha-te-panč) centimetarya bourhlo oun ninna yaake pral.

² Dren oun vin čivas lo lačo sonakay pre, oun kras i sonakaskro pandepen trouyel.

³ Oun yob kras star sonakangre goustria oun čivas len ap hake star herya, douy ap haki rig.

⁴ Ninna kras lo lengste kashta dran akatstikro kasht, čivas sonakay troul lende,

⁵ oun čivas len an kol goustria, yaake te nay hidjrenn le ko morhton trouyel.

⁶ Oun yob kras o pralstouno kotar, hoy čakrell o morhton dran lačo sonakay. Kova his 125 (sheel-te-biish-te-panč) centimetarya lengsto oun 75 (efta-desha-te-panč) centimetarya bourhlo.

^7-8 Oun yob kras douy bolepangre, hakenes dran yek kotar sonakay, oun čivas ko yekes glan ap o pralstouno kotar oun ko vavares palla ap o pralstouno kotar.

⁹ Oun kol bolepangre hadan pengre moussya pre oun čakran lentsa o pralstouno kotar. Oun lengre shere dikan pen an. Oun lengre yaka dikan tella ap o pralstouno kotar.

O Debleskri rhapaskri

¹⁰ Oun yob kras koy rhapaskri dran akatstikro kasht, yek metari lengsto, i paash metari bourhlo oun 75 (efta-desha-te-panč) centimetarya pral,

¹¹ oun čivas lačo sonakay troul late. Ninna čivas lo i sonakaskro pandepen troul late.

¹² Troul i rhapaskri čivas lo i tikno kasht ap haki rig, hoy i vast bourhlo hi. Oun troul ko tikno kasht vas ninna i sonakaskro pandepen.

¹³ Oun yob kras star sonakangre goustria oun pandas len ap kol star herya,

¹⁴ tel ko tikno kasht, hoy djal troul i rhapaskri, yaake te nay čivan le lengste kashta dren, te hidjrenn le koy rhapaskri.

¹⁵ Oun yob činas kol lengste kashta dran akatstikro kasht, te nay hidjrenn le koy rhapaskri, oun čivas sonakay troul lende.

¹⁶ Oun yob kras ninna ko tselo koova, hoy ap i rhapaskri vell, dran lačo sonakay: čare oun khore, an kolende i mool o Debleske dren anlo vell.

I momelengri

¹⁷ Oun yob kras koy momelengri dran yek kotar lačo sonakay: Lakro piro oun ko mashkralstouno kotar oun kol čare. Ap kolende hi bloume, save, hoy pandlo hi oun save, hoy pre hi.

¹⁸ Shob moussya djan dran i momelengri vin, triin ap yek rig oun triin ap i vavar rig.

¹⁹ Ap haki moussi hi triin čare, hoy vin dikenn har bloume, save, hoy pandlo hi oun save, hoy pre hi.

²⁰ Ap ko mashkralstouno kotar hi star čare, hoy vin dikenn har i bloume, save, hoy hi pandlo, oun save, hoy hi pre.

²¹ Hako kopo hi yek blouma, hoy pandlo hi, tel douy kol shob moussyendar, hoy dran o mashkralstouno kotar vin djan.

²² Oun kol bloume oun i moussya hi leha khetne kerdo dran yek kotar lačo sonakay.

²³ Oun ninna dran lačo sonakay kras lo kol efta momlia, lengre činepangre, kolentsa i dorya an i momlia tele činlo venna, oun i čare, kay i momelengri čik dren vella.

²⁴ Les hounte vas yek centnari lačo sonakay, te krell lo kay momelengri oun lakro tselo koova.

O sonakaskro bob

²⁵ Yob kras ninna i bob dran akatstikro kasht. Koy pre vell soungepaskro koova rhačedo. Ko bob his i paash metari lengsto oun ninna yaake bourhlo oun yek metari pral. Ap hake star rigya, kote, kay le khetne venna, vas i kotar vin, hoy vin dikella har i shing.

²⁶ Yob čivas lačo sonakay troul o bob, pral pre oun ninna ap i star rigya oun ap i shinga. Oun čivas i sonakaskro pandepen troul o bob.

²⁷ Ap i douy rigya čivas lo douy sonakangre goustria tel o sonakaskro pandepen, te nay čivenn le lengste kashta dren oun yaake te hidjrenn le les.

²⁸ Oun kol lengste kashta kras lo dran akatstikro kasht, oun čivas sonakay troul lende.

²⁹ Oun yob kras o makepaskro djet, koleha yon o Debleskro koova dren makenn. Ninna kras lo ko kouč soungepaskro koova, hoy rhačedo vell. Kova lauter kras yob yaake har kolla, kay kova mishto hayvenna.