2. Mose 10 - O Debleskro Lab 2024 (Sinte-Manouche)

I orhtati phagi: Stepangre venna

¹ Pal kova penas o baro Devel ap o Mose: “Dja pash o Farao dren! Me pandom leskro dji, ninna i djia leskre pralstunendar, te nay krom kava baro koova an miri zoor mashkral lende.

² Kova krom, te nay peness tou tire čavenge oun tire čavengre čavenge, har krom me ap i Egiptarya, oun havo baro koova me krom mank lende an miri zoor. T'mer hounte djinenn, te hom me o baro Devel.”

³ Kote djas o Mose oun o Aron pash o Farao dren oun penan ap leste: “Kava penell o baro Devel, o Devel pral i Hebrearya: Har rah kameh tou gar te dikell, kay hom zorleder har tou? Mouk mire menshen te djal, te nay mangenn le man an!

⁴ Te moukeh tou gar mire menshen te djal, palle kamau me taysar stepangre pral tiro them te bičrell.

⁵ Kolla čakrenn o them, oun hi yaake boud, te nay dikeh i phoub bouder gar. Oun kolla rhan kova pre, hoy pral ačas, har o barrengro brishin peras oun boud djob paash das. Ninna i patria ap i rouka rhan le pre.

⁶ Oun tiro kheer oun i khera, kay tire pralstoune oun i vavar Egiptarya djivenn, venn pherdo stepangre. Savo koova vas gar diklo an o them Egiptia, yaake rah har tire phoure an kava them djivan.” Pal kova rissras pes o Mose oun djas peske dran o Faraeskro kheer vin.

⁷ Kote penan i pralstoune ap o Farao: “Har rah anell kava morsh gomme bibarht pral mende? Mouk kol menshen te djal, te mangenn le lengro baro Debles an. Hayveh tou gar, te djal i tseli Egiptia nashedo?”

⁸ Kote pre vas o Mose oun o Aron pale glan o Farao anlo. Oun yob penas ap lende: “Djan oun mangenn t'maro baro Debles an! Koon hi kolla t'mendar, kay djan?”

⁹ Oun o Mose penas: “Mer djah i ternentsa oun i phourentsa, mare čaventsa oun čentsa. Ninna mare bakre, bouzya oun groumya lah mentsa. Mer kamah maro baro Debles te sharell oun leske firhen te marell.”

¹⁰ O Farao penas ap lende: “O baro Debleskri barht pral t'mende! Patseh tou čačepah, kay me moukau t'men t'mare čaventsa te djal? Ap kova dikenn, te hi t'men čilačepen an o shero.

¹¹ Na-a, yaake gar! T'mer morsha kokres, djan oun mangenn t'maro baro Debles an! Kova hi, hoy t'mer kaman.” Oun yon tradan len dran o Faraeskro kheer vin.

¹² Kote penas o baro Devel ap o Mose: “Hade tiro vast pral o them Egiptia pre, te venn i stepangre pral o tselo them, oun rhan lauter hoy pral ačas, har o barrengro brishin ap o them peras.”

¹³ Oun o Mose hadas peskro kasht pral o them Egiptia. Kote moukas o baro Devel ko tselo dives oun i tseli rat yek zorelo dourho pral o them te phourdell, hoy vas katar, kay o kham pre djal. Oun taysarlakro phourdas ko dourho i stepangre an o them.

¹⁴ Oun yaake van i stepangre pral o tselo them Egiptia. Yon his yaake boud, har gomme gar koy his oun gar bouder venna,

¹⁵ oun čakran i phoub, yaake te vas o tselo them kales. Oun yon rhan o tselo zenlepen oun lauter, hoy ap i rouka baro vas, hoy pral ačas, har o barrengro brishin ap o them peras. Kek zenlepen ačas pral ap i rouka oun ap i harhetikri phoub an o tselo them Egiptia.

¹⁶ Kote moukas o Farao o Moses oun o Arones sik gole te dell, oun penas ap lende: “Me anom doosh ap mande glan t'maro baro Debleste, oun ninna glan t'mende.

¹⁷ Yaake mangau t'men, bistrenn miri doosh kokres kava yek kopo, oun mangenn t'maro baro Debles, te lell lo kava merepen mandar krik.”

¹⁸ Oun o Mose djas vin dran o Faraeskro kheer oun mangas o baro Debles leske.

¹⁹ Oun o baro Devel kras, te phourdas ko baro dourho kanna zoreles katar, kay o kham tele djal. Oun ko dourho hadas i stepangre pre oun vitsras len an o baro pani, hoy kharella Baro Lolo Pani. An o tselo them Egiptia ačas kek stepaskro pral.

²⁰ Ninna kava kopo pandas o baro Devel o Faraeskro dji. Oun yob moukas i Israelitaryen gar te djal.

I enyati phagi: Kali rat

²¹ Kote penas o baro Devel ap o Mose: “Hade tiro vast pre pash o bolepen! Palle vell savi kali rat pral o tselo them Egiptia, kay dikeh nay tiro vast gar glan i yaka.”

²² Oun o Mose hadas peskro vast pash o bolepen pre. Kote vas i kali rat pral o tselo them Egiptia. Triin divessa ačas li.

²³ Yaake kales his, te nay dikas yek o vavares gar. Oun kek stas kote pre, kay yob his. Pash i Israelitarya his dives, kote kay yon djivan.

²⁴ Kote moukas o Farao o Moses gole te dell, oun penas ap leste: “Djan oun mangenn t'maro baro Debles an! Ninna t'mare romya oun čave nay djan t'mentsa. Kokres t'mare bakren, bouzya oun groumyen moukenn kay!”

²⁵ O Mose penas: “Na-a, ninna te kamals tou men firhen te dell, hoy mer maro baro Debleske marah oun rhah, ninna saven, hoy mer leske tseles rhačrah,

²⁶ ninna palle djan mare tsele firhe mentsa. Kek heri lendar nay ačella kay. Kol firhendar lah mer, te das len maro baro Debleske. Oun mer djinah gar, have firhe te maras mer leske ap o drom, kote kay djah.”

²⁷ Oun pale pandas o baro Devel o Faraeskro dji, te moukas lo len pale gar te djal.

²⁸ Oun o Farao penas ap leste: “Dja touke mandar! Oun de tout yak, te vess bouder gar glan mire yaka! Ap ko dives, kay tou pale glan mire yaka veh, dau tout moulo.”

²⁹ Koy penas o Mose: “Yaake har tou penal, me vau touke bouder gar glan tire yaka.”