2. Familjakro liil 4 - O Debleskro Lab 2024 (Sinte-Manouche)Kava koova his an o Debleskro baro kheer dren o Debleskri rhačepaskri dran lolo saster 1 Oun yob kras i Debleskri rhačepaskri dran lolo saster. Koya his deesh metarya lengsto oun bourhlo oun panč metarya foun tel bis pral. o baro thopaskro čaro dran lolo saster 2 Oun yob kras i baro rundo thopaskro čaro dran lolo saster. Kova his panč metarya lengsto foun yek rig ap i vavar, oun douy-te-paash metarya foun tel bis pral. Oun i dori, hoy 15 metarya lengsto hi, djals troul leste trouyel. 3 Oun pral troul ko thopaskro čaro his figure har groumya, deesh figure ap i paash metari. Kolla djan douy kope troul o čaro, oun his khetne ko čareha dran lolo saster an yek kotar kerdo. 4 Tardo his ko thopaskro čaro ap deesh-te-douy groumya dran lolo saster. Kolendar dikan triin ap i servi rig, triin ap i palstouni rig, triin ap i čači rig oun triin ap i glanstouni rig. Lengre palstoune herya his mashkral dren. 5 Ko lolo saster foun ko thopaskro čaro his yaake pesso har i vast. Oun leskro mouy his har o mouy i khorestar. Kova dikas vin har i lilya, te djal li pre. An ko thopaskro čaro djan 60.000 litarya dren. o panyeskre pirya dran lolo saster 6 Oun yob kras deesh bare panyeskre pirya. Oun panč kolendar čivas lo ap i čači rig oun panč kolendar ap i servi rig, te nay thovenn le kol kotya mass, hoy o Debleske rhačedo venn. O baro thopaskro čaro moukas lo koy te čivell, te nay thovenn pen i rashaya koy dren. sonakaskro koova an o Debleskro kheer 7 Oun yob kras deesh sonakangre momelengre yaake, har leske penlo vas, oun čivas len an o Debleskro baro kheer, panč ap i čači rig oun panč ap i servi rig. 8 Oun yob kras deesh rhapangre oun čivas len ninna an o kheer, panč ap i čači rig oun panč ap i servi rig. Oun yob kras sheel sonakangre čare. Vavar koova dran lolo saster 9 Oun yob kras i glanstouni platsa i rashayenge, ninna i bari glanstouni platsa oun voudya glan i glanstouni platsa, oun moukas kol voudya lolo sasteha pral te tserdell. 10 Oun o baro thopaskro čaro čivas lo ap i čači rig glan o kheer, kote kay o kham pre djala. 11 Oun o Houram kras ninna pirya, bare roya, oun čare. Oun yaake kras lo halauter, hoy o ray Salomo lestar kamas, te krell lo o Debleskro khereske. 12 Kava koova his: kol douy turme oun lengre sherya; kol douy shoukar pandepen dran shelle, hoy ap i sherya his; 13 kol star sheel phabya, hoy van pandlo ap o pandepen, te čakrenn le i sherya ap i turme: ap yek pandepen his douy reihe phabya, yek sheel phabya an haki reiha; 14 panyeskre vourdya oun kol bare pirya koy pre; 15 o baro panyeskro čaro oun i deesh-te-douy groumya koy tel; 16 Kol tsele kotya, hoy kras o Houram-Abi o baro Debleskro khereske, yaake har o baro ray Salomo leske penas, kolla his halauter dran shoukar kerdo lolo saster. 17 O baro ray moukas ko lolo saster tato te krell, oun an phoubyengre forme te čorell an o telstouno them pash o pani Yordan mank kol forya Soukot oun Zereda. 18 Oun o Salomo moukas yaake boud kotya dran lolo saster te krell, te nay penas kek, har pharo kova lauter his. Vavar koova dran sonakay 19 Ninna moukas o Salomo ko tselo koova te krell, hoy hounte vell tardo an o Debleskro kheer: o sonakaskro bob; i rhapangre, kay o Debleskre mare pre čiddo venn; 20 i momelengre oun lengre momlia, hoy tardo venn glan o Debleskri kouč isema, yaake har glan-činlo hi – kolla his dran djoudjo sonakay; 21 i sonakangre bloume ap kol momelengre; i momlia; i činepangre, kolentsa i dorya an i momlia tele činlo venna; kova lauter his dran sonakay. 22 i čourya, čare o rateske, roya oun pirya, – kolla lauter his dran djoudjo sonakay; kol voudya glan o Debleskri kouč isema oun glan o Debleskro kheer. Kalla his kerdo dran sonakay. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.