2. Familjakro liil 3 - O Debleskro Lab 2024 (Sinte-Manouche)

O Debleskro kheer vell kerdo

¹ Oun o Salomeskre boudepangre kran pen ap i boudi te krenn le o kheer o baro Debleske an o foro Yerusalem ap i berga Moriya, ap i platsa, hoy o Salomeskro dad, o David, vin rodas. Koya his koy djobeskri platsa, hoy o morshes Arauna his. Kova his i Yebousari. Glan i tsiro moukas pes kote o baro Devel o Davidestar te dikell.

² An o starto bersh, har o Salomo o baro ray pral Israel his, an o douyto čon, ap o douyto dives kran pen leskre boudepangre ap koy boudi, te krenn le o baro Debleskro kheer.

³ Oun kava hi o barepen o kherestar, hoy o Salomo o Debleske kras: o kheer his triyanda metarya lengsto, oun deesh metarya bourhlo.

⁴ Oun koy glanstouni halla glan o kheer his yaake bourhlo har ko kheer, deesh metarya, oun 60 (shob-deesh) metarya foun tel bis pral. Oun kay bari halla vas dren lačo sonakayeha pral-maklo.

⁵ An o baro kheer moukas lo i massurya o kashteha te čakrell, hoy vell kol roukendar, kay kharenn cipresse. Oun pral ko kasht vas lačo sonakay maklo oun figure dren činlo, hoy vin dikan har palme oun pandle shelle.

⁶ Oun yob moukas ko kheer kouč barrentsa shoukar te krell. Oun ko sonakay his sonakay, hoy vas dran Parvayim.

⁷ Oun yob tserdas lačo sonakay pral halauter dren an o kheer: i pesse hidjepaske kashta, i kashta an i voudya, i massurya oun i voudya. Oun an i massurya moukas lo bolepangre, dren te činell, hoy kharenn Keroubim.

O Debleskri kouč isema

⁸ Oun yob kras o Debleskri kouč isema. Koy isema his deesh metarya lengsto oun deesh metarya bourhlo, yaake bourhlo har ko tselo kheer. Oun yob moukas lačo sonakay pral i massurya te tserdell. 600 (shob sheel) centnarya sonakay lan le koleske.

⁹ Oun i paash kilogrammi sonakay lan le, te krenn le nagle. Ninna i pralstoune iseme van pral-maklo o sonakayeha.

¹⁰ Oun yob moukas ninna douy bolepangre te krell, hoy kharenn Keroubim, te venn le an kay kouč isema tardo. Kolla his shoukar kerdo oun pral-maklo o sonakayeha.

^11-13 Len his moussya har čirkle, hakenes his douy moussya. Haki moussi his douy-te-paash metarya baro. Kol star moussya bourhles kerdo his khetne deesh metarya lengsto. Yaake djas koy moussi yekestar bis ap koy yek massouri, oun koy moussi o vavarestar bis ap koy vavar massouri. Mashkralstounes van i moussya khetne. I figure his tardo ap pengre pire, oun lengre mouya dikan ap o voudar.

¹⁴ Oun o Salomo moukas ninna i plarhta te krell o voudareske. Koya his kerdo dran lačo layntikro than oun thabentsa, hoy his blaueto, lolo oun lolo har yag. Oun Keroubim his dren sido.

Kol douy turme dran lolo saster

¹⁵ Oun glan o kheer moukas lo douy turme te krell. Hakeno his 17,5 (deesh-te-efta-te-paash) metarya baro, oun les his i shero, hoy his 2,5 (douy-te-paash) metarya baro.

¹⁶ Oun yob kras i pandepen dran shelle oun čivas les pral ap i turme. Oun moukas sheel phabya te krell oun pandas len ap kol shelle.

¹⁷ Oun yob čivas kol douy turme pre glan o Debleskro kheer, yek ap i čači rig, oun yek ap i servi rig. Oun moukas ko turmo ap i čači rig Yakin te kharell. Oun ko turmo ap i servi rig moukas lo Boas te kharell.