1. Timoteo 3 - O Debleskro Lab 2024 (Sinte-Manouche)

I phoureder mank i patslende

¹ Kova, hoy kanna penau, hi čačo. Te kamell yek i phoureder te vell mank i patslende, kova kamell i lači boudi.

² I phoureder hounte djivell yaake, te hatsell kek i doosh ap leste. Les vell gar boudeder har yek romni. Yob rakrell kek dinelo koova, oun dell pes yak, hoy yob rakrell oun krell. Yob moukell pes gar an djoungelo koova te tserdell. Yob lell i vavaren lačes an peskro kheer dren. Yob sikrell mishto o Debleskro drom.

³ Yob hi kek pipaskro. Yob hi kek marepaskro. Les hi i baro dji i vavarenge. Yob hi kek čingepaskro. Yob hi gar pal i love.

⁴ Yob hi i lačo ray pral peskro kheer. Leskre čave shounenn ap leste.

⁵ Hi kava morsh kek lačo ray pral peskro kheer, nay vell lo vitar gar i lačo ray pral i patslende, kay venn khetne an o Debleskro lab.

⁶ I phoureder mank i patslende hounte vell gar neves an o patsepen, te nay phourdell lo pes gar pre. Te phourdas pes lo pre, nay tserdell les o beng o Debleskro dromestar tele.

⁷ I phoureder hounte vell yek, pral koleste ninna kol menshe, kay gar patslo hi, mishto rakrenna. Yaake hounte ladjell lo pes gar, oun perell gar an o bengeskro vast.

I boudepangre an o Debleskro kheer

⁸ Yaake har i phoureder mank i patslende hounte djivenn lačes glan i menshengre yaka, yaake hounte djivenn kolla ninna, kay boudrenn i patslenge an o Debleskro kheer. Yon te rakrenn gar douy čipyentsa. Yon te venn kek pipangre. Yon te nashenn gar pal i love.

⁹ Yon hounte rikrenn zoreles ap o čačepen, hoy o Devel sikras. Lengro patsepen hounte vell dran i djoudjo dji.

¹⁰ Lenn t'men i tsiro, te dikenn t'mer, har yon djivenna. Te nashte rakrell kek pral lende djoungelo koova, palle nay boudrenn le i patslenge an o Debleskro kheer.

¹¹ I djouvya, kay hi i patslenge koy, hounte djivenn ninna lačes glan i menshengre yaka. Yon rakrenn kek rhorheno koova pral i vavarende. Yon rakrenn kek dinelo koova. Yon krenn pengri tseli boudi mishto.

¹² I morsh, kay boudrella i patslenge an o Debleskro kheer, les vell gar boudeder har yek romni. Yob hounte vell i lačo dad peskre čavenge, oun i lačo ray pral peskro kheer.

¹³ Kol boudepangre, kay pengri boudi mishto krenna, kolla venn an-diklo pash i patslende, oun pash o Debleste. Oun len hi kek daar, te rakrenn le pral pengro patsepen ap o Yezous Kristeste.

Baro hi o Debleskro čačepen

^14-15 Me kamau te vap sik pash toute. Te nay vau gar yaake sik, djineh tou kanna, har te krenn le lauter an o Debleskro kheer. Doleske činom touke kava liil. I patsle hi o kheer o djido Deblestar. Yon rikrenn pen zoreles ap o Debleskro čačepen. Yon hi har kol telstoune barra, hoy o kheer khetne rikrenna.

¹⁶ Čačepah, an maro patsepen hi i baro čačepen: O Debleskro čavo vas i mensho. Hoy yob kras, hi čačo. Ko sikras men o Debleskro Dourho. I bolepangre dikan ap leste. An i tsele themma rakran le lestar. Ap i tseli phoub patsan le ap leste. An o bolepen las les o Devel pash peste.