1. Korintarja 14 - O Debleskro Lab 2024 (Sinte-Manouche)

O rakepen, hoy o Debleskro Dourho i patslende della

¹ Krenn lauter, te lenn o Debleskro kamlepen an t'maro dji! Oun rodenn i tselo djiyestar kol zorya, hoy o Debleskro Dourho an t'mende čivella, te nay boudrenna o Debleske! Boudeder har hako vavar koova rodenn koy pal, te penenn nay i menshenge i lab, hoy vella o Deblestar.

² Kova, kay rakrella an i rakepen, hoy o Debleskro Dourho les das, oun hoy kek hayvella, kova rakrell gar i menshenge. Yob krell kova o Debleske. O Debleskro Dourho dell les koy zoor, te rakrell lo, hoy kek mensho djinella.

³ Kova, kay penell i menshenge i lab, hoy vella o Deblestar, kova rakrell yaake ap i menshende, te vell lengro patsepen zoreles, oun te venn lengre djia barhteles oun zoreles.

⁴ Kova, kay rakrella peske an i rakepen, hoy o Debleskro Dourho les das oun hoy kek hayvella, koleske djal feteder an peskro dji. Kova, kay penell i patslenge i lab, hoy o Deblestar vella, krell kova, te vell kolengro patsepen zoreles.

⁵ Ninna te kamoms me, te rakrans t'mer lauter an i rakepen, hoy o Debleskro Dourho das, kamoms me boudeder, te penans nay t'mer lauter i menshenge i lab, hoy vella o Deblestar. Hi boudeder moldo, te penell yek i lab, hoy vella o Deblestar, har te rakrell yek an i vavar rakepen, hoy kek hayvella. Hi vavarčandes, te hi yek koy, kay penell nay, hoy an ko vavar rakepen rakedo vas, yaake te venn i patsle zoreles an o patsepen.

⁶ Kanna, mire phrala, har vals kova, te voms me pash t'mende, oun rakroms an i rakepen, hoy kek hayvella? Kova molals t'menge či. T'menge hi boudeder moldo, te rakrap an i rakepen, hoy t'mer hayvenna, oun te penap t'menge, hoy o Devel mande sikras, oun hoy lestar djinau. Oun t'menge hi ninna boudeder moldo, te penap t'menge i lab, hoy vella o Deblestar, oun te sikrap t'men, har te djan ap o Debleskro drom.

⁷ Kova hi yaake har o bashepen. Te bashrell yek gar mishto, hayvell kek, hoy bashedo vella.

⁸ Te djan i lourde an o kourepen, palle phourdell yek ap i bashepaskri. Oun yob te phourdella yaake djoungeles, te hayvell les kek, palle djal kek an o kourepen.

⁹ Yaake hi kova ninna t'mentsa. Te rakrenn t'mer an i rakepen labentsa, hoy kek hayvella, har nay hayvell yek, hoy t'mer penenna? T'mer rakrenn čičeske.

¹⁰ Dell boud menshe an boud themma. Oun hakenes hi peskro rakepen.

¹¹ Te hayvau me gar ko vavareskro rakepen, hom me koleske i vi-themari. Oun ninna yob hi mange i vi-themari.

¹² Yaake hi kova ninna t'mentsa. T'mer kamenn o tselo djiyestar kol zorya te lell, hoy o Debleskro Dourho della. Krenn lauter, te lenn boud kolestar, hoy krell i patslen zoreles an o patsepen!

¹³ Hi yaake: Koon an i rakepen rakrella, hoy das les o Debleskro Dourho, kova hounte mangell o Deblestar, te nay penell lo i menshenge kova, hoy koy rakedo vas.

¹⁴ Me te rakrau an i rakepen, hoy o Debleskro Dourho man das, palle krell kova o Debleskro Dourho an mande. Oun me hayvau gar, hoy me penom.

¹⁵ Hoy hounte krap me kanna? Me kamau te rakrap o Debleha an i rakepen, hoy o Debleskro Dourho man das. Ninna kamau me te rakrap leha i labentsa, hoy me hayvau. Oun me kamau leske te givap, har o Debleskro Dourho moukell man te givell. Oun ninna kamau te givap i labentsa, hoy me hayvau.

¹⁶ Te shareh tou o Debles an i rakepen, hoy o Debleskro Dourho tout das, oun koy hi yek, kay hayvell kova gar, har nay penell yob Amen ap kova, hoy tou penal?

¹⁷ Leskro dji vell gar zoreles, ninna te parkral tout tou o djiyestar pash o Debleste.

¹⁸ Me parkrau man pash o Debleste, kay rakrau boudeder har t'mer lauter an i rakepen, hoy o Debleskro Dourho man das.

¹⁹ Te hom me mank i patslende, te sikrap len o Debleskro drom, kamau kote feteder panč laba te rakrell, hoy hakeno hayvella, har deesh zerya laba an i rakepen, hoy kek hayvella.

²⁰ Mire phrala, ma avenn har tikne čave, kay gomme gar boud djinenna. Avenn gosevo har i phoure! Pash čilačo koova, avenn har tikne čave, hoy o čilačepen gar hayvenna!

²¹ An o Debleskro lab hi činlo: Me kamau te rakrap ap kal menshende an o vavar rakepen. Oun vi-themarya penenn lenge mire laba. Oun ninna palle shounenn le gar ap mande, penell o Devel.

²² Yaake dikenn t'mer: O Debleskro Dourho dell o vavar rakepen, te sikrell o Devel peskri zoor kolende, kay gar patsenna, oun gar i patslende. Hi vavarčandes, te penell yek i lab, hoy vella o Deblestar. Ko lab hi i patslenge oun gar kolenge, kay patsenna gar ap o Debleste.

²³ Dikenn, te vans i tsele patsle khetne, oun rakrans lauter an i vavar rakepen, oun koy vals yek, kay gar patslo hi oun kay prindjrell kova gar, penals kova: “Kalla hi lauter narvele!”

²⁴ Hi vavarčandes, te lell hakeno i lab o Deblestar, oun penell les glan i vavarende, oun koy vella yek, kay gar patsella oun o tselo koova gar prindjrella, koleske djal lauter an leskro dji, oun leske djan i yaka pre pral peskri doosh.

²⁵ Hoy an leskro dji khatedo hi, vell diklo. Oun yob moukell pes glan tele perell ap i phoub oun mangell o Debles an, oun penell: “O Devel hi čačepah pash t'mende!”

Har lauter djala kote, kay i patsle khetne venna

²⁶ Mire phrala, hi yaake: Te venn t'mer khetne, sharell ko yek o Debles i gilyah. I vavar sikrell, har te djan ap o Debleskro drom. Ninna i vavar penell, hoy o Devel les sikras. Pale i vavar rakrell an i rakepen, hoy o Debleskro Dourho les das. Oun i vavar nay penell, hoy koy rakedo vas. Lauter kova krenn, te venn i patsle zoreles an o patsepen!

²⁷ Te hi menshe koy, kay rakrenn an i vavar rakepen, moukenn te rakrenn douy te triin, gar boudeder har triin, yek pal o vavareste! Oun yek hounte penell, hoy rakedo vas.

²⁸ Te hi kek koy, kay penell nay, hoy koy rakedo vas, palle moukenn kekes an i vavar rakepen te rakrell. Yob nay rakrell khere peske kokres oun o Debleske.

²⁹ Kolla, kay penenna i menshenge i lab, hoy o Deblestar vella, kolendar moukenn te rakrenn douy te triin! Oun kol vavar denn garda, te hi kova čačo, hoy rakedo vella!

³⁰ Te penell yek i lab o Deblestar, oun o Devel sikrell čomone ap i vavareste, kay koy pashel beshdo hi, hounte moukell ko ersto koles te rakrell.

³¹ T'mer lauter nay penenn yek pal o vavareste i lab, hoy vella o Deblestar. Yaake dikenn lauter, har te djan o Debleskro drom. Oun lauter venna zoreles an o patsepen.

³² Kones i lab vell o Deblestar, kova nay rikrell pes pale, yaake rah har ko vavar rakrella.

³³ O Devel kamell kek čingepen. Yob kamell, te djal lauter mishto. Kova hi yaake an hake forya, kay i patsle khetne venna.

³⁴ Te venn t'mer khetne an o Debleskro kheer, ma moukenn i djouvyen te rakrell. Yon hounte shounenn ap kova, hoy penlo vella. Yaake hi ninna činlo an o Moseskre lila.

³⁵ Te kamell i djouvel čomone te djinell, poučell li khere peskro romestar. Kova hi gar mishto, te rakrell i djouvel an o Debleskro kheer.

³⁶ Vas o Debleskro lab t'mendar? Na-a! Vas o Debleskro lab pash t'mende kokres? Na-a!

³⁷ Te patsell yek t'mendar, kay o Devel rakrell leha, oun kay o Debleskro Dourho les o Debleskro koova sikrell, yaake hayvell yob, te hi kava gar mandar, hoy me kate činau. Kava hi o Deblestar.

³⁸ Koon kova gar kamell te dikell, ap koleste dikenn vitar gar!

³⁹ Mire phrala, mangenn o Debles, te nay penenn i menshenge i lab, hoy lestar vella! Oun moukenn kolen te rakrell, kay kamenna an ko rakepen te rakrell, hoy o Debleskro Dourho len das!

⁴⁰ Krenn kava yaake, te djal kova lauter mishto oun shoukar!