Tobit 8 - Pijin Deuterocanon

¹ Taem kaikai hemi finis, an olketa redi fo slip, mami an dadi blong Sera i tekem go Tobias long disfala rum wea Sera hemi stap long hem.

² Tobias hemi tingim wanem Rafael hemi talem long hem. So hemi tekemaot disfala liva an haat blong fis ya from smol basket, an hemi putum go long insens wea hemi bone.

³ Smel blong haat an liva ya, hemi ronemaot devol ya from tufala, an hemi ranawe go long Ijip. Rafael hem ronem devol ya an kasholem hem, an hemi taengem tufala lek an tufala han blong hem.

Prea blong Tobias

⁴ Taem Tobias an Sera i stap seleva insaet long rum, Tobias hemi getap from bed, an tok olsem long waef blong hem, ?Waef blong mi, yu getap kam. Yumitufala prea go long Lod mekem hemi kaen long yumitufala an gadem yumitufala.?

⁵ Sera hemi getap, an tufala prea tugeta, an askem God fo gadem tufala. Tobias hemi prea olsem, ?God blong olketa ologran blong mifala, hemi fitim fo evriwan i preisim yu. Letem evrisamting long heven an long wol i mekhae long nem blong yu evritaem olowe.

⁶ Yu bin mekem Adam, an yu givim Iv fo kamap waef blong hem, fo helpem hem, an fo sapotem hem. Tufala kamap mami an dadi blong evri pipol long wol. Yu nao bin talem dat hemi nogud fo man hemi stap seleva. An yu bin sei wea bae yu mekem wanfala hu hemi fitim fo helpem hem.

⁷ Lod, hemi stret nomoa fo mi tekem Sera olsem waef blong mi. Hemi no bikos mi laekem bodi blong hem nomoa, bat bikos hemi raet long lo blong Mosis. Lod, plis yu sore kam long mitufala, mekem mitufala save laef longtaem, go-go mitufala olo tugeta.?

⁸ Bihaen, tufala sei ?Hem nao?.

⁹ An long naet ya, tufala go slip nao. Mami an dadi blong Sera i wari tumas Long datfala naet, Raguel hemi kolem olketa wakaman blong hem, an olketa go fo digim wanfala grev.

¹⁰ Hemi olsem bikos Raguel hemi tingting olsem, ?Ating sapos Tobias hemi dae, evriwan bae i laf long mifala an tokspoelem mifala.?

¹¹ Taem olketa digim finis grev ya, Raguel hemi gobaek long haos, an tok olsem long waef blong hem,

¹² ?Sendem wanfala haosgele fo lukim sapos Tobias hemi dae. Sapos hemi dae finis, bae mifala go berem hem bifoa eniwan hemi save.?

¹³ So tufala sendem wanfala haosgele fo tekem wanfala laet mekem hemi go lukim sapos Tobias hemi dae finis nao o laef yet. Taem hemi openem doa long rum blong tufala, hemi lukim dat tufala slip gud nomoa.

¹⁴ Haosgele ya hemi kambaek an talem Raguel an Edna wea Tobias hemi laef an stapgud nomoa.

¹⁵ So Raguel hemi preisim God long heven. Hemi prea olsem, ?O God, hemi fitim fo mifala preisim yu. Letem pipol blong yu i preisim yu olowe wetem gudfala haat.

Prea blong Raguel

¹⁶ Mi preisim yu bikos yu nao yu mekem mi hapi. Yu bin sore kam long mifala, an wanem mifala fraetem, hemi no hapen.

¹⁷ O Lod, hemi fitim fo mifala preisim yu, bikos yu kaen tumas long tufala niu marit ya. An tufala ya, tufala nomoa i bon long tufala famili blong tufala. Mi askem yu fo sore kam long tufala an gadem tufala. Helpem tufala fo stap long hapi laef, an tufala garem lav olowe.?

¹⁸ Bihaen, Raguel hemi talem olketa wakaman blong hem fo filimap grev ya bifoa hemi delaet.

Fist blong marit

¹⁹ Raguel hemi talem waef blong hem fo bekem plande bred fo fist blong marit. Bihaen, hemi go long ples wea olketa buluka an sipsip i stap long hem, an tekem kam tufala man buluka an fofala man sipsip. An hemi talem olketa wakaman blong hem fo kilim olketa dae an redim fo disfala fist ya.

²⁰ Den, hemi kolem Tobias an hemi tokstrong long hem olsem, ?Long nem blong God, mi no letem yu fo gobaek insaet tufala wik. Yu mas stap fastaem. Insaet long tufala wik ya bae yumi kaikai an dring tugeta. Yumi mas duim olsem mekem dota blong mi hemi filgud moa bihaen olketa nogud samting wea hemi safa long hem.

²¹ Bihaen, bae mi givim yu haf long olketa samting wea mi onam, an yu tekem gobaek long dadi blong yu. An taem mitufala Edna i dae, bae yu tekova long evri narafala samting wea mi onam. Yu no daotem lav blong mitufala fo yu, bikos stat distaem, yu barava olsem nao san blong mitufala, olsem wea Sera hemi dota blong mitufala. San blong mi, yu mas trastem wanem mi talem.?