Esikiel 15 - Pijin Deuterocanon

Parabol abaotem brans blong grep tri

¹ Yawe hemi talemaot Mesij blong hem long mi. Hemi tok olsem,

² “Man blong graon. ?Waswe, yu tingse brans blong grep tri hemi moabeta winim brans blong olketa narafala tri long bus?

³ Brans ya blong grep tri hemi no strong, so yu no save mekem enisamting long hem wea yu save yusim ya. Yu no save wakem peg long hem fo holem long enisamting.

⁴ ?Waswe, sapos faea hemi bonem tufala en blong hem, an midol long hem nomoa hemi stap wea hemi blak finis long faea, yu tingse yu save yusim nomoa fo mekem eni gudfala samting long hem? Hemi gud nomoa fo bone long faea.

⁵ Wud blong grep tri ya hemi yusles bifoa hemi bone long faea. So hemi yusles moa taem faea hemi bonem finis, an hemi nogud tumas nao.

⁶ “Dastawe nao mi Lod Yawe, mi tok olsem: Olsem wea mi bin mekem brans blong grep tri wea hemi gud nomoa fo faeawud, olketa pipol blong Jerusalem bae i olsem tu.

⁷ Ya, bae mi agensim olketa. Nomata olketa bin ranawe finis from wanfala faea, bat distaem bae faea hemi bonem olketa evriwan dae. An taem mi agensim olketa, bae yufala jes save dat mi nao Yawe.

⁸ Bae mi mekem lan blong olketa hemi emti, bikos olketa les long mi nao. Hem nao mesij blong mi Lod Yawe.”