Коринфынхидтэ 1-дэхи 15 - Шэнэ Хэлсээн

Христос үхэлые илаба

¹ Мүнөө, аха дүүнэр, минии таанадта номноһон, таанадай тогтоожо абаһан, этигэл һүзэгэйтнай һуури табиһан Һайн Мэдээсэл таанадта һануулхамни.

² Тэрэнэй ашаар таанад абарагдаһан байгаат. Минии таанадта номноһон Мэдээсэл хатуугаар баримталжа байһандаа таанад абарагдабат, хэрбээ үгы юм һаа, таанад дэмы һүзэглэһэн байгаат.

³ Нангин Бэшэг соо уридшалан хэлэгдэһэнэй ёһоор Христос манай нүгэл шэбэлэй түлөө үхэһэн байгаа гэһэн эгээн шухала юумые би өөрөө тогтоожо абаад, һүүлдэнь таанадта дамжуулһан байгааб.

⁴ Тэндэл уридшалан хэлэгдэһэнэй ёһоор Христос хүдөөлүүлэгдээд, гурбадахи үдэртөө амидыруулагдаһан байгаа,

⁵ тиигээд Пётрто, һүүлдэнь арбан хоёр шабинартаа бултандань үзэгдэһэн байгаа.

⁶ Тиигээд тэрэ табан зуугаад шахуу һүзэглэгшэдтэ нэгэ зэргэ үзэгдэһэн юм. Тэдэ һүзэглэгшэдэй олониинь мүнөөшье хүрэтэр амиды мэндэ, харин зариманиинь наһа бараһан байна.

⁷ Тиигээд тэрэ Яковта, удаань элшэнэртэ бултандань үзэгдэбэ.

⁸ Хамагай һүүлдэ тэрэ намдашье үзэгдөө. Би дутуу гараһан үхибүүндэ адли хүнби.

⁹ Элшэнэрэй эгээн «багань» гээшэб, элшэн гэжэ нэрлэгдэхэшье эрхэгүй байгааб, юундэб гэхэдэ, би һүзэглэгшэдэй бүлгэмые хашан мүрдэдэг байгааб.

¹⁰ Гэхэтэй сасуу би Бурханай үршөөл хайраар мүнөөнэй байдалтай байнаб, тиин тэрэ үршөөл хайрань дэмы үнгэрөөгүй. Би өөрынгөө хүсэ шадалаар бэшэ, харин досоомни ажаллажа байһан Бурханай үршөөл хайраар бусад элшэнэрһээ үлүү ехэ хүдэлжэ байгааб.

¹¹ Тиимэһээ би байна гүб, али тэдэнэр гү, бидэ булта илгаагүй Мэдээсэлые номнонобди, тиин таанад һүзэглэбэт.

Үхөөд амидырха тухай

¹² Христос үхөөд амидыруулагдаһан байгаа гэжэ номножо байхадамнай заримантнай юундэ үхэһэн хүнүүд амидырхагүй гэжэ хэлэнэб?

¹³ Хэрбээ үхэһэн хүнэй амидырха аргагүй һаань, Христосшье амидырхагүй байгаал.

¹⁴ Хэрбээ Христос үхөөд, амидыраагүй юм һаа, маанадай номноһон дэмы, таанадай һүзэглэһэн дэмы юм.

¹⁵ Харин үхэһэн хүнүүд амидырдаггүй юм һаа, бидэ Бурханай Христосые амидыруулаагүй байхадань амидыруулаа гэжэ хэлэхэдээ, Бурхан тухай худалаар гэршэлһэн болонобди.

¹⁶ Ушарынь юуб гэхэдэ, хэрбээ үхэһэн хүнүүд амидырдаггүй юм һаа, Христосшье амидыруулагдаагүй гээшэ.

¹⁷ Хэрбээ Христосой амидыруулагдаагүй юм һаа, танай этигэл һүзэг дэмы, таанад нүгэл шэбэлтэйгээ үлэнэ гээшэт.

¹⁸ Тиихэдээ Христосто һүзэглөөд үхэһэн хүнүүд баһал хосороо гэжэ ойлгожо болохо.

¹⁹ Хэрбээ бидэ гансал энэ амидаралдаа Христосто найдажа байбал, бидэ бүхы дэлхэй дээрэ эгээл аза хубигүй зон гээшэбди.

²⁰ Зүгөөр Христосой үхөөд амидыруулагдаһаниинь үнэн зүб юм. Үхөөд амидыруулагдаха зондо энэнь баталалга юм.

²¹ Нэгэ хүнөөр дамжан үхэл тудаба, тон тиигэжэл нэгэ хүнөөр дамжан үхэлһөө амидыралга тудаха.

²² Хүнүүд булта Адамтай холбоотой байһан дээрэһээ яажа үхэдэг бэ, тон тиигэжэл булта Христостой холбоотой байһан дээрэһээ амидыруулагдаха.

²³ Гэхэдээ хүн бүхэн өөрынгөө ээлжээгээр, хамагай түрүүн Христос, тиигээд тэрэнэй ерэхэдэ бүхы тэрэнэй хүнүүд амидыруулагдаха.

²⁴ Тиигээд бүхы юумэнэй эсэс ерэхэ, Христос бүхы хүсэнүүдые, замбуулинай бүхы засаг захиргааниие, засаглагша захирагшадые илаад, хаан түрые Эсэгэ Бурханда барюулха.

²⁵ Христос бүхы дайсадаа ула дороо оруултараа захирха.

²⁶ Һүүлшынь дайсан болохо үхэл усадхагдаха.

²⁷ «Бурхан бүхы юумые ула доронь оруулха», – гээд Нангин Бэшэгтэ хэлэгдэнэ, зүгөөр тэрэ «бүхы юумэнэй» тоодо Христосой ула доро бүхы юумые оруулһан Бурхан өөрөө ороногүй гэжэ ойлгосотой бэзэ даа.

²⁸ Христос бүхы юумэнүүдые захирхадаа, бүхы юумые мэдэлдэнь оруулһан Бурханай мэдэлдэ өөрөө орохо, тиигээд Бурхан хамаг юумые бүрин захиржа байха.

²⁹ Хэрбээ амидыралгын үгы юм һаань, үхэһэн хүнүүдэй түлөө уһаар арюудхуулһан зон яахань гээшэб? Хэрбээ үхэһэн хүнүүдэй юрэдөө амидырдаггүй юм һаань, яахадаа хүнүүд тэдэнэй түлөө уһаар арюудхуулнаб?

³⁰ Бидэшье юундэ аюул оһолтой үргэлжэ нюураараа тулана гээшэбибди?

³¹ Аха дүүнэр, би үдэр бүхэн үхэлтэй нюураараа уулзанаб. Манай Дээдын Эзэн Иисус Христостой нэгэдэһэн ажамидаралтнай минии омогорхол байһан дээрэһээнь би энээн тухай айладханаб.

³² Хэрбээ би юрэ хүн шанараараа бодоод, «ан арьяатануудтай» Эфес хотодо тулалдабал, намда ямар аша туһа байгааб? Хэрбээ үхэһэн хүнүүдэй амидырдаггүй юм һаа, хүнүүдэй хэлээшээр «үглөөдэр хосорхо юм һаа, мүнөө эдие, ууял».

³³ Таанад бү эндүүржэ ябагты. «Муу ханинар һайн сэдьхэлтэй хүниие доройтуулдаг».

³⁴ Ой ухаандаа орогты, нүгэл хэхэеэ болигты. Заримантнай Бурханиие мэдэхэгүй, тиин эшэжэ зобожо байхаартнай энээниие хэлэнэб.

Үмхирэн хосордог ба үмхирдэггүй мүнхэ бэе тухай

³⁵ «Яажа үхэһэн хүнүүд амидырдаг бэ? Ямар махабад бэетэй байха бэ?» – гээд хэн нэгэн асуужа магадгүй.

³⁶ Ямар тэнэг гээшэбта! Үрэһэ тарихадашни тэрэ үрэһэншни хосороогүй һаа, амидыран ургахагүйл.

³⁷ Таряа гү, али ямаршьеб ондоо үрэһэ тарихадаа ши бүтэн ургамал бэшэ, зүгөөр үрэһэ һуулгана ха юмши.

³⁸ Харин Бурхан өөрынгөө дураар тэрэ үрэһэндэ бэе хайрлана, тиин үрэһэ бүхэндэ өөрынь тусхай бэе хайрлана.

³⁹ Бэенүүд ондо ондоо байдаг: хүнүүд нэгэ түрэлэй бэетэй, амитад ондоо түрэлэй бэетэй, шубууд баһа ондоо бэетэй, загаһад үшөө ондоо бэетэй байдаг.

⁴⁰ Тиихэдэ огторгойн бэенүүд ба газар дэлхэйн бэенүүд байдаг. Газар дэлхэйн бэенүүдэй һүр жабхаланиинь огторгойн бэенүүдэй һүр жабхаланһаа илгаатай юм.

⁴¹ Наранай һүр жабхалан нэгэ, һарын һүр жабхалан ондоо, одо мүшэдэйшье һүр жабхалан баһа ондоо, тиихэдэ одо мүшэд бэе бэеһээ баһа һүр жабхалангаараа илгардаг юм.

⁴² Тон тиимэл юумэн үхэһэн хүнүүдэй амидырхада болохо: махабад бэе үхэл соо таригдаад амидырхадаа, үмхирдэггүй мүнхэ болохо.

⁴³ Һуулгагдахадаа, тэрэ нэрэ түрэгүй, ахир һула байха, харин амидырхадаа, алдартай, һүр хүсэтэй байха.

⁴⁴ Һуулгагдахадаа, юрэ махабад бэе байгаад, амидырхадаа, оюун сэдьхэлэй бэе байха. Юрэ махабад бэе байбал, оюун сэдьхэлэй бэешье байха.

⁴⁵ «Түрүүшын хүн, Адам, амитан болон бүтээгдээ, харин һүүлшын Адам ами хайрладаг Һүлдэ юм», – гээд Нангин Бэшэг соо хэлэгдэнэ.

⁴⁶ Анха түрүүн оюун сэдьхэлтэй бэшэ, харин юрэ махабад бэетэй ерэхэ, тиигээд оюун сэдьхэлтэй болоод ерэхэ.

⁴⁷ Түрүүшын Адам газар хүрьһэнһөө бүтээгдэһэн газар дэлхэйн хүн юм, харин нүгөө Адам тэнгэриһээ юм.

⁴⁸ Газар дэлхэйн хүнүүд газар хүрьһэнһөө бүтээгдэһэн үнөөхи хүндэ адли, харин тэнгэриин хүнүүд тэнгэриһээ ерэһэн нүгөө хүндэ адли.

⁴⁹ Газар хүрьһэнһөө бүтээгдэһэн хүнэй түхэл шанартай ябадагтаал адляар бидэ баһа Тэнгэриин хүнэй түхэл шанартай ябахалди.

⁵⁰ Махабад бэе шуһан хоёрһоо бүтээгдэһэн юумэн Бурханай хаан түрые залгамжалха аргагүй, үмхиржэ хосордог юумэн үмхирдэггүй мүнхэ юумые залгамжалха аргагүй юм гэжэл би таанадта хэлэхэ һанаатай байнаб.

^51-52 Зай, би таанадта үнэн зүб нюуса нээнэб: бидэ булта үхэхэгүйбди, гэхэтэй сасуу бүреэгээ һүүлшынхиеэ дуугархада бидэ булта нюдэнэй сабшаха зуура гэнтэ хубилгагдахабди. Бүреэгээ дуугархада үхэһэн хүнүүд хэтын хэтэдэ үхэхэгүйгөөр амидыруулагдаха, тиин бидэшье хубилгагдахабди.

⁵³ Тиигэжэ үмхирэн хосордог юумэн үмхирдэггүй мүнхэ юумэн боложо хубилха ёһотой, үхэлэй юумэн үхэдэггүй юумэн боложо хубилха ёһотой.

⁵⁴ Үмхирэн хосордог юумэнэй мүнхэ боложо хубилхада, үхэлэй юумэнэй үхэдэггүй боложо хубилхада, «Үхэл хосорбо, илалта туйлагдаба», – гэжэ Нангин Бэшэг соо хэлэгдэһэн юумэн бэелхэ.

⁵⁵ «Ай, Үхэл, илалташни хаанаб? Ай, Үхэл, хадхууршни хаанаб?»

⁵⁶ Үхэлэй хадхуурай хорон нүгэл шэбэл соо юм, нүгэл шэбэлэй хүсэн Хуули соо юм.

⁵⁷ Харин манай Дээдын Эзэн Иисус Христосой ашаар маанадта илалта хайрлаһан Бурханда баяр баясхалан хүргэел!

⁵⁸ Тиимэһээ, инаг хайрата аха дүүнэрни, Дээдын Эзэнэй түлөө хэһэн ямаршье ажалтнай дэмы бэшэ гэжэ мэдэн, Дээдын Эзэнэй ажалда өөһэдыгөө бүрин зорюулагты, нугаршагүй, бата хатуу байгты.