Zaburey 96 - Songhai de Gao Bible

Aduɲɲa kul ma Abadantaa saabu

¹ Wa dooni taaga don Abadantaa se, laboo kul cere ra, ma don Abadantaa se!

² Wa don Abadantaa se ka maaɲoo beerandi, zaari kul war ma alhabaroo har kaŋ ti nga ti Hallasikaa.

³ Wa nga daržaa har dumey kul game, wa nga goy kayfantey har gandawey kul ra.

⁴ Zama Abadantaa ga beeri, a ga hima nda saabuyan, a ga hunburandi ka bisa koyey kul.

⁵ Zama jamawey kul koyey manʼti kala taari koyyaŋ, amma Abadantaa ka beenaa tee.

⁶ Beeray nda darža manʼti kala nga wane, hinay nda dawla goo nga nongu henanantaa ra.

⁷ Jamawey alaayan beerey kul, wa beeray nda hini daŋ Abadantaa se, wʼi daŋ a se!

⁸ Wa Abadantaa noo nga maaɲoo daržaa, wa kate gomniyaŋ, wa huru Abadantaa hugoo batumawey ra.

⁹ Wa sujudu Abadantaa se kaŋ henanyanoo ga dii garaw. Laboo kul borey ma jijiri Abadantaa jine.

¹⁰ Wa nee dumey se kaŋ Abadantaa ti Kokoy, aduɲɲa ga kay nga dogoo ra, a si ɲuuti. A ga jamawey ciiti nda fondaa.

¹¹ Yala beenaa ma ɲaali! Laboo ma farhã, yala teekoo nda haya kul kaŋ goo a ra ma dunduŋ!

¹² Yala hawsaa nda haya kul kaŋ goo a ra ma ɲaali kaati beeri tee! Waatoo din hawsaa tuurey kul ga kaati nda ɲaali

¹³ Abadantaa jine, zama a goo ma kaa, zama a goo ma kaa ka laboo ciiti, a ga aduɲɲa ciiti nda šerretaray, a ga nga cimoo ka jamawey ciiti.