Zaburey 83 - Songhai de Gao Bible

Izirayel borey Irkoy ŋaarayroo ngi iberey maaganda

¹ Dooni. Woo ti Asaf zabur foo.

² Ya Irkoy, masi hunanzam, masi dangay, masi tee suk, ya Irkoy!

³ Zama sohõ da, ni iberey goo ma kosongu kar, wey kaŋ konna ni ga ngi boŋey jer.

⁴ I ga marga ka dabari futu haw ni jamaa ga, i ga hawandifutay borey ga kaŋ talfandi ni ga.

⁵ I ga nee: «Wa kaa, ir ma ngi gandaa derandi kʼa kaa gandawey ra, hala boro masi yee ka honga Izirayel maaɲoo.»

⁶ I ga tee bine foo ka hawandifutay, ka amaana tee ka tee ni ga affoo.

⁷ I manʼti kala Edom borey, nda Isimayel borey, nda Mowab borey, nda Hagri borey,

⁸ nda Gebal borey, nda Amoŋ borey, nda Amalek borey, nda Filisti borey, nda Tir koyraa gorokey.

⁹ Asiri borey mo tonton i ga, i ga kabe daŋ Lotu izey se. Kay-kayna

¹⁰ Takaa tee i se kaŋ nʼnʼa tee Majaŋ gandaa se, sanda woo kaŋ duu Sisera nda Yabin Kišoŋ haroo miɲoo ga!

¹¹ I halacandi En-Dor koyraa ra, i tee žiibi laboo se.

¹² Takaa kaŋ nʼnʼa tee Oreb nda Zeb se tee ngi boŋkoyney se, ka takaa follokaa tee ngi jineborey kul se sanda woo kaŋ nʼnʼa tee Zeba nda Salmunna se.

¹³ Borey no kaŋ nee: «Ir ma Irkoy gorodogey dii kʼi tee ir wane.»

¹⁴ Ay Koyoo, i tee sanda hewkur, sanda subu kaŋ hewoo gʼa zaa.

¹⁵ Sanda takaa kaŋ nda nuune ga hawsaa ton, sanda takaa kaŋ nda nuune deene ga tondi hondey diinandi,

¹⁶ takaa din da i gaarandi nda ni kusaa, mʼi hunburandi nda ni hew futaa.

¹⁷ Abadantaa, i haawandi hala i ma ni maaɲoo ceeci.

¹⁸ Yala waati kul i ma haw i ma hunbur, i ma haw, i ma halaci.

¹⁹ Woo ra i ga bay kaŋ ni kaŋ maaɲoo ti Abadantaa, ni hinne ti Koy Jerantaa laboo kul boŋ.