Zaburey 8 - Songhai de Gao Bible

Irkoy beeraa nda nga daržaa

¹ Donkey boŋkoynoo ka woo don. Dooni kaŋ bande Gat koyraa nzarka goo. Woo ti Dawda zabur foo.

² Abadantaa, ir Koyoo, ni maaɲoo ga beeri laboo kul ga, ni beeraa bisa beenaa wanoo.

³ Zanka kaccey nda naanandey miɲey nda nʼga ni gaaboo cebe ni nkuwawey se, ka iberey nda borey kaŋ ga baa ngi ma ngi dukuroo kaa ni ra miɲoo daabu.

⁴ Nda ay na beenaa guna kaŋ ni kabey nʼa tee, nda handoo nda handarawey kaŋ nʼnʼi gorandi,

⁵ macin ti boro hala ma hongu a, adamize ti macin hala ma huga nda a?

⁶ Ka gar haya kayna nda Irkoy goo adamizey jine, nʼna darža nda beeray tee a se boŋkoyni fuula.

⁷ Nʼnʼa daŋ hayey kul jine kaŋ ni kabey nʼi tee, nʼna haya kul daŋ cewey cire,

⁸ a ma tee alman buuna nda ibeeri, i kul cere ra, ba ganjihoogawey,

⁹ nda beenaa cirawey, nda teekoo hamiisawey, nda haya kul kaŋ ga zuru teekowey bande.

¹⁰ Abadantaa, ir Koyoo, ni maaɲoo ga beeri laboo kul ga.