Zaburey 64 - Songhai de Gao Bible

Goy futu teekaw, nga goyey no mʼa kaŋandi

¹ Donkey boŋkoynoo ka woo don. Woo ti Dawda zabur foo.

² Ya Irkoy, haŋajer ay ŋuunuŋuunuyanoo se, ay soolam iberoo ra kaŋ ay ga hunbur a!

³ Ay hallasi boro futu teekey alkuniyaa ra, nda jamaa ra kaŋ ga šerretaray jaŋaa tee!

⁴ I na ngi deeney kaanandi sanda takuba, ngi šenney ga hima nda biraw-ize kaŋ ga boro maray!

⁵ Ngi tugudogoo ra i ga boro laadirante kar, i gʼa kar bila hunburay.

⁶ I ga cere gaabandi goy futu ga, i ga cere guna ka tugu ka kumsayyaŋ hirri, ka nee: «May no ma dii ey?»

⁷ I si haya kul miile kʼa tee kala goy futu, i ga nee: «Ir soolu, goyoo ben! Adamize kuneheroo nda binoo manʼti kala guusu kuku.»

⁸ Amma Irkoy ga biraw-ize kʼi warra, i ga maray dogoo din da.

⁹ Ngi deeney kʼi kaŋandi, boro kul kaŋ dii ey ga nga boŋoo zinji-zinji.

¹⁰ Adamizey kul ga hunbur, i ga Irkoy teegoyey har, i ga duu nga teegoyey ra fahamay.

¹¹ Boro šerrante ga ɲaali Abadantaa ra ka nga boŋ talfi a ga, borey kul kaŋ biney ga šerre, ngi boŋey ga jer.