Zaburey 58 - Songhai de Gao Bible

Koy goo no kaŋ ga laboo ciiti

¹ Donkey boŋkoynoo ka woo don. Takaa kaŋ nda a ga doonoo woo don se i ga nee «Masʼa halaci.» Woo ti Dawda bayti foo.

² Cimi ti kaŋ dangayyan ti war ciitoo? War ga adamizey ciiti nda fondaa wala?

³ Kalaa, war biney ra war ga goy futu tee, war kabey ga teegoy laala boobandi gandaa ra.

⁴ Boro futawey hibi Irkoy ga za ngi ɲaŋey gundey ra, taariharkey na fondaa naŋ za ngi hayyanoo ga.

⁵ I goo nda naaji kaŋ ga hima nda gandakarfu naajoo, wala firsaw lutu kaŋ ga nga haŋaa daabu,

⁶ a si maa kottekoynoo jindoo, ba albidakoyney kul ihennaa.

⁷ Ya Irkoy, hiɲey kayri miɲey ra! Abadantaa, ganjihayla soogey hiɲey kayri-kayri!

⁸ Yala i ma dere sanda hari kaŋ mun! Yala ngi biraw-izey masi duu gaabi!

⁹ Yala i ma tee sanda jingam kaŋ ga menne waynaa ra, sanda zanka kaŋ mana hayandi nda hundi kaŋ si dii waynaa!

¹⁰ Za karjey mana tee karjiɲaa, a ga firzi wala a ga kogu, hewoo ga koy nda ey.

¹¹ Boro šerrantaa ga ɲaali, zama a dii kaŋ Irkoy faasa nga se, a ga nga cewey ɲumay boro laaley kuroo ra.

¹² Woo ra borey ga nee: «Jaka boro šerrantaa goo nda banaw, jaka Koy goo no kaŋ ga laboo ciiti.»