Zaburey 142 - Songhai de Gao Bible

Irkoy ga nga tamey noo nga lakkaloo

¹ Woo ti Dawda bayti dooni foo. A manʼa don kala waatoo kaŋ a goo tondi horboo ra. Irkoy ŋaarayyan no.

² Ay ga jinde jer ka Abadantaa cee, ay ga jinde jer ka kaati ka Abadantaa suurandi.

³ Ay ga agay šugulla daŋ a jine, ay gʼay binemaraa daŋ a jine.

⁴ Nda ay binoo hun, ni, nʼga fondaa bay kaŋ ga ay goo. I tugu ka kumsay hirri ya ne fondaa ga kaŋ ra ay ga dira.

⁵ Ni kabe gumaa heroo guna, ma dii kaŋ boro kul si kula ay ra, lanbadoo kul dere ya ne, boro kul si alhuzun nda ay hundoo.

⁶ Abadantaa, ni no ay ga kaati ka ni cee. Ay nee: «Ni ti nongoo kaŋ ra ay gʼay boŋ talfi, ni ti ay bagaa baahunantey laboo ra.»

⁷ Haŋajer ay kaatiroo se, zama ay sahãa ben, ay hundoo feeri kʼay kaa borey kaŋ gʼay gaaray kabey ra, zama i goo nda gaabi ka bisa agay.

⁸ Ay hundoo kaa kasaa ra hala ya ni maaɲoo šifa. Boro šerrantey ga kaa kʼay kuubi kʼay bere waati kaŋ nʼna gomni tee ya ne.