Zaburey 125 - Songhai de Gao Bible

Irkoy ga nga ganakey hawgay

1 Woo ti žigiyanoo dooni foo.

¹ Woo ti žigiyanoo dooni foo. Borey kaŋ ga ngi naanaa daŋ Abadantaa ra ga hima nda Siyoŋ tondi hondoo kaŋ si ɲuuti, a goo no abada.

² Tondi honduyaŋ no ma Žerizalem kuubi kʼa bere, takaa din da nda Abadantaa ga nga jamaa kuubi kʼa bere za sohõ da hala abada.

³ Zama boro laaley kokoy goboo si duu boro šerrantey tuboo, hala boro šerrantey masi kabe šerre haya se kaŋ si šerre.

⁴ Abadantaa, gomni tee boro henney nda borey kaŋ biney ga šerre se.

⁵ Amma borey kaŋ ga šiiri ka koy fondo golbantey here, yala Abadantaa ma kate nda ey, ngi nda goy futu teekey! Yala alaafiya ma kaa Izirayel ga!