Zaburey 105 - Songhai de Gao Bible

Irkoy ga laadir

¹ Wa Abadantaa saabu, war ma maaɲoo cee! Wa nga teegoyey bayrandi jamawey ra!

² Wa don a se, wa don kʼa saabu, wa nga goy kayfantey kul har borey se!

³ Wa fooma nda nga maa henanantaa, yala borey kaŋ ga Abadantaa ceeci biney ma ɲaali!

⁴ Wa Abadantaa nda nga gaaboo ceeci, war ma nga ndumoo ceeci waati kul!

⁵ Wa hongu haya kayfantey kaŋ a nʼi tee, nda nga kayfey nda nga miɲoo ciitey,

⁶ war kaŋ ti Ibirahima, nga tamoo hayroo, war kaŋ ti Yakuba izey kaŋ a nʼi suuba!

⁷ Nga ti Abadantaa, ir Koyoo, nga hantumey kaŋ kayandi goo laboo kul ga.

⁸ A ga hongu nga amaanaa waati kul, yaamaroo kaŋ a nʼa noo alwadda zenber (1.000) se,

⁹ woo kaŋ a nʼa daŋ nga nda Ibirahima game, nda žeeyanoo kaŋ a nʼa tee Isiyaka se.

¹⁰ A nʼa kayandi sanda ašariya Yakuba se, kʼa tee amaana duumante Izirayel se.

¹¹ A nee: «Ay ga kaa ka ni noo Kanaŋ gandaa a ma tee war tuboo, a ma tee war wane.»

¹² Alwaatoo din, boro hinna kaccu no, i si boobo, i goo yawtaray ra no din.

¹³ I ga yaara gandawey nda cere game, ka hun ganda foo ra ka koy affoo ra.

¹⁴ Amma Irkoy mana naŋ boro kul mʼi šiita, a citi kokoyyaŋ ga ngi maaganda.

¹⁵ A nee: «War masi tuku ay suubantey kaŋ yonandi ga, war masi albasi tee agay annabey se!»

¹⁶ A na heray cee gandaa ga, a nʼi jaŋandi ŋaayan dumi kul.

¹⁷ A na aru sanba i jine: Isufi neerandi sanda baɲɲa.

¹⁸ I na cewey daŋ gaalayaŋ ra, i na jindoo daŋ guuruyaŋ ra,

¹⁹ hala waatoo kaŋ ra šennoo kaŋ Isufi nʼa har tee, Abadantaa nʼa noo cimi.

²⁰ Kokoyoo na yaamar noo kaŋ i mʼa naŋ, jamawey jineboraa nʼa feeri.

²¹ A nʼa tee nga hugoo jineboraa, kʼa tee nga hayey kul boŋkoynoo,

²² hala a ma nga goykaw beerey cawandi woo kaŋ a ga baa, ka kokoyoo boro beerey noo lakkal.

²³ Woo banda ga, Izirayel koy Misira. Yakuba tee yaw Šam gandaa ra.

²⁴ Irkoy hanse ka nga jamaa boobandi, a nʼa noo gaabi ka bisa nga torrokey.

²⁵ Woo banda ga, Irkoy na Misira borey biney barmay, takaa kaŋ ra i konna Irkoy jamaa, i na nga tamey zanba.

²⁶ A na nga tamoo Musa sanba nda Haruna kaŋ a nʼa suuba.

²⁷ I na Irkoy tammaasawey tee i game, ka kayfiyaŋ tee Šam gandaa ra.

²⁸ A na kubay sanba, kubaa na nongoo dii, i mana ture nga šennoo ga.

²⁹ A na ngi harey bere kʼi tee kuri, a na ngi hamiisawey wii.

³⁰ Ngi gandaa too met nda kormoto hala ngi kokoyey hugu-izey gundey ra.

³¹ A šelaŋ, hamniyaŋ kaŋ ga ɲama kaa, ngi laboo kul tee ndeŋ.

³² A na gari tee i se ncirɲi, ka nuune beeri tunandi ngi gandaa ra.

³³ A na ngi alanebɲaŋey nda jeejayɲaŋey hasara, ka ngi laboo tuurey kayri.

³⁴ A šelaŋ, ndoowey kaa, ndoo beeriyaŋ kaŋ si kabandi,

³⁵ kaŋyaŋ na ngi gandaa suboo kul ŋaa, i na ngi laboo dumari-izey ŋaa.

³⁶ A na ngi gandaa gunde jinawey kul kar kʼi wii, ngi gaaboo ize jina-jinawey.

³⁷ A na nga jamaa kaataray nda nzorfu kaaray nda wura, boro kul mana cindi banda ngi alkabiilawey ra.

³⁸ Ngi fattaroo tee ɲaali Misira borey se, zama i nka tee i se hunburay beeri.

³⁹ A na duula daaru kʼi gum nda nuune kʼi noo gaay cijin here.

⁴⁰ I nʼa ŋaaray, a na jerfendayyaŋ sanba i se, a nʼi kungandi nda beenaa ŋaahaya.

⁴¹ A na tondoo feeri, hari fatta, a doori ka koy sanda isa saajey ra.

⁴² Zama a ga hongu nga šenni henanantaa, a ga hongu nga tamoo Ibirahima.

⁴³ A na nga jamaa kaataray nda binekaanay, borey kaŋ a nʼi suuba ɲaali kaatiyaŋ ra.

⁴⁴ A nʼi noo dumiyaŋ gandawey, i duu jamayaŋ faraa bagaa,

⁴⁵ hala i ma nga hantumey dii, de i ma gaabu nga ašariyawey ga. Aleluya!