Ayuba 24 - Songhai de Gao Bible

¹ «Macin se Hini-kul-koyoo si waati kayandi ciitiyan se? Macin se borey kaŋ gʼa bay si dii haney din?

² Boroyaŋ ga ngi faarey kanjey silbawey hibi kʼi tonton, i ga alman kur zay kʼi kur ngi boŋ se.

³ I ga alyatimey farkawey dii ka koy, i ga woyey kaŋ kurɲey buu hawoo dii tolme.

⁴ I ga alfukaarey kaa fondaa ga, gandaa talkey kul ga tugu.

⁵ Sanda ganjifarka kaŋ goo saajoo ra, i ga koy goy za alfazar ka ŋaayan ceeci, ganganoo ra i ga duu ŋaayan ngi izey se.

⁶ I ga subey dunbu hawsaa ra, i ga boro futawey alaneb-izey kurma-kurma,

⁷ I ga cijinoo tee gaa koonu bila bankaaray, i sii nda gum taafe hargoo se.

⁸ Tondi hondey ncirɲey nʼi tayandi, i sii nda tugudoo, i mma ngi boŋ naagu tondey ga.

⁹ Boroyaŋ ga alyatimoo hoobu kʼa taa ɲaŋoo kone, i ga talkaa almaney dii tolme.

¹⁰ I ga dira gaa koonu bila bankaaray, i ga heray, i ga jeeniyaŋ jere.

¹¹ I ga jii tee zaytuɲaŋey jere, i ga alaneb-ize hari kaa, amma i ga jaw.

¹² Koyraa ra borey kaŋ ga buu ga yooyo, borey kaŋ maray ga hẽe, i ga kaati ka faaba ceeci, amma a mana tee Irkoy se haya kul.

¹³ Boroyaŋ no kaŋ ture gaayoo ga, i si nga fondawey bay, i si cindi nga fondawey ra.

¹⁴ Boro wiikaw ga tun waati kaŋ gaayoo bangay, a ga talkaa nda alfukaaroo wii. Cijin here a ga hima nda zay.

¹⁵ Zinateeri ga almaaroo monno, a ga nee: ‹Boro kul si dii agay.› A ga sanfiti gum nga ndumoo ga.

¹⁶ Kubaa ra, i ga hugey kayri ka huru i ra, zaaroo ra, i ga ngi boŋ daabu hugu ra, i si gaayoo bay.

¹⁷ Ngi kul se, subbaahi manʼti kala buuyan biyoo, i ga buuyan biyoo torraa bay.

¹⁸ War ga nee kaŋ haroo ga koy nda boro futu nda gaabi, laaliyan ti nga bagaa laboo ga, a si yee ka alaneb faarey fondaa zaa.

¹⁹ Sanda takaa kaŋ nda kogay nda konnoo ga neeži hari kogandi, takaa din da alaahara ga zunubantey derandi.

²⁰ Gundoo kaŋ ra a hun dirɲa a, nooney ga maakaani a ra. Šerretaray jaŋay ka kayri sanda tuuri.

²¹ Woy gun do a ga koy, woy kaŋ sii nda ize, a si gomni tee woy kaŋ kurɲoo buu se.

²² Amma Irkoy ga nga gaaboo ka gaabikoyney kar. Nda a tun, boro si yee ka tammahã hunayan ra.

²³ A gʼa naŋ, a ga hongu nga goo alaafiya ra, amma moɲey goo ngi fondawey ga.

²⁴ Boro laaley ga jerandi waati kayna, woo banda ga, i ga dere. I ga kaŋ sanda takaa kaŋ nda tuuri fita ga kaŋ, i ga dunbandi sanda jeeniyaŋ.

²⁵ Manʼti woo no wala, may no ma hin kʼay taarandi? May no ma hin kʼay šenney kakaw.»