PA’PUDIAN 99 - Sura' Madatu

PUANG Iamo Datu maserona to Israel 99:1-9

¹ PUANG tu untoe kapayungan – la ma’parondo mintu’ bangsa. Ia unnisungi karubion la rumonting te lino.

² Pasareongan tu PUANG lan Sion. Sia Iamo untongloi mintu’ bangsa.

³ Sipatu mintu’ la umpudi tu kakapuanna sangamMi sia kametakuranna; Masero Ia.

⁴ Belanna iatu kamatotoranNa Datu ungkabarii katonganan. Mangkamo Mipantok tu atoran malolo, sia mangkamo Mipogau’ tu katonganan sia kamaloloan dio lu bati’na Yakub.

⁵ Pakala’bi’i tu PUANG, Kapenombanta. Sia tukkukomi menomba diong to’ pelleseanNa; Masero Ia.

⁶ Iatu Musa sola Harun tama bilangan to minaanNa, na iatu Samuel tama bilanganna to umpengkamoyai sanganNa; mintu’i sola nasang pada meongli’ lako PUANG, sia Natanannimo talinga tu tau iato mai.

⁷ Ma’kadami lanmai lentong gaun lako tau iato mai, anna karitutui tau iato mai tu mintu’ kasa’bianNa, sia iatu aluk Napondok Nasoronganni lako.

⁸ O PUANG, Kapenombangki, Mitanannimo talinga tu tau iato mai, sia Kamumo napoKapenomban umpa’dei kasalan, moi amMi mangka umpakkanni tu penggauran kadakena.

⁹ Pakala’bi’i tu PUANG, Kapenombanta, sia tukkukomi menomba umpennoloi buntu maindanNa, belanna masero tu PUANG, Kapenombanta.