PA’PUDIAN 92 - Sura' Madatu

Pa’pudi-pudian lako Puang Matua, belanna lalan kaparentan malambu’Na 92:1-16

¹ Pa’pudian. Nanian allo katorroan.

² Iamote tu maelona, kumua melo ke umpudii PUANG tu tau, sia umpakendekan pa’pudian sangamMi, o Patodoranna.

³ Melo ke napa’peissananni ke melambi’ tu kamasokanamMi, sia napa’peissanan ke bongi tu kamarurusamMi.

⁴ Dipasiala paningoan sangpulo ritinna sia dandi, sisola oni-onian naturu’ katapi.

⁵ Belanna Mipasendemo’ penggauramMi, o PUANG, sia mela’tekna’ diona mintu’ lalan limamMi.

⁶ Tangpada kapuanna tu penggauramMi, o PUANG; sia mintu’ tangnga’Mi tang dilambi’ diukkunni.

⁷ Iatu to baga pu’pu’ tang natamai tu iannato, sia iatu to tang paissan tang naka’da’ tu susinnato.

⁸ Iake lobo’i tu to tang mekaaluk susi riu, sia memba’ka’ tu mintu’ to umpogau’ kakadakean iatu iannato, kumua anna sabu’ nasang tu tau iato mai sae lakona.

⁹ Apa Kamu, o PUANG, unnisung dao masuanggana tontong sae lakona.

¹⁰ Belanna manassa mintu’ ualimMi, o PUANG, manassa mintu’ ualimMi la sanggang. Sia mintu’ tu to umpogau’ kakadakean la dipasisarak-sarak.

¹¹ Apa Mipataranggana’ susi tedong lampung, sia Mitokkomo’ minna’ ba’ru’;

¹² parannuna’ untiroi tu kasangganganna to undakaranna’ kakadakean sia parannuna’ urrangi kasangganganna to umbalina’.

¹³ Iatu to malambu’ la lobo’ ten to koroma, sia la longke butung kayu arasi’ dio Libanon:

¹⁴ Belanna ditanan lan banuanNa PUANG, anna lobo’ lan tarampakNa Kapenombanta:

¹⁵ La membua nasangpa kematuami, sia lobo’ sia maluna;

¹⁶ Anna pa’peissananni kumua iatu PUANG manappa’, Iamo buntu batungku, sia tae’ narandan lenNi kakelokan.