PA’PUDIAN 54 - Sura' Madatu

Passambayangna Daud malaku dilendokan dio mai mintu’ ualinna 54:1-9

¹ Lu lakona pangala sengo; dipasiala oni katapi. Misa’ gelong bangunan ada’na Daud,

² tonna saemo tu to Zifi umpokadai lako Saul nakua: Tang membuni dioraka kaleku tu Daud?

³ Lendokanna’, o Puang Matua, tete dio sangamMi, sia sanda tongannina’ tete dio kuasamMi.

⁴ Perangii tu passambayangku, o Puang Matua, sia tanding talingai tu dara’ lengko lilaku.

⁵ Belanna ba’tu pira-pira tu to tang unnissan battuan unneamo’, sia ba’tu pira-pira to masa’ga’ la ungka’tu sunga’ku, sia tae’ nakilalai tu Puang Matua lan penaanna. Sela

⁶ Puang Matua tu Patunduangku, sia Puang tu ussande’na’.

⁷ Ia la umpapakkanni kakadakeanna to undakaranna’ kasanggangan, mangsanni tu tau iato diona kamarurusamMi.

⁸ La Kupenomban mati’ Kalemi tu pemala’ naturu’ sanning penaangku, sia umpudi sangamMi, o Puang, belanna maelo ia.

⁹ Belanna Narampanammo’ dio mai mintu’ kapussakan, sia parannuna’ untiroi tu kamandasanna mintu’ ualingku.