PA’PUDIAN 53 - Sura' Madatu

Diona kamatampoanna to baga 53:1-7

¹ Lu lakona pangala sengo. Unturu’ baenan sengo: Mahalat. Misa’ gelong bangunan ada’na Daud.

² Nakua tu to baga lan penaanna: Tae’ ia tu Kapenomban. Lendu’ ia mesolanginna sia megi’giranna tu penggauranna; sia tae’i misa’ umpogau’ melo.

³ Natiro lumbang Puang Matua lan mai suruga tu mintu’na ma’rupa tau, la untiroi ba’tu la denni tau unnampui tangnga’ kinaa, sia undaka’ Puang Matua.

⁴ Pusa nasangmo tu tau iato mai sia dadi asu nasangmo; tae’mo tau misa’ umpogau’ melo, moi misa’ tae’ dukamo.

⁵ Tae’raka kapaissananna tu mintu’ to ma’gau’ kadake, tu unnimbakan taungKu butung ungkande bo’bo’? sia tae’ nameongli’ lako Puang Matua.

⁶ Tonna iato naluang nasang kamatakuran kapua, anna moi to tae’ bannangna nanii mataku’; belanna pantan Napatorro simisa’mo Puang Matua tu buku lampana mintu’ to umpatama limbuko, la mupadenan kamasirisan tu tau iato mai, belanna Natibemo Puang Matua.

⁷ Nalu daomora mai Sion tu kamakarimmananna to Israel. Iake Napaka’pannimi Puang Matua sule tu serongna taunNa, maneri parannu paiman tu Yakub, la sende pakadua tu Israel.