PA’PUDIAN 52 - Sura' Madatu

Dalle’na misa’ to masa’ga’ tu ullangdo to masallo’ 52:1-11

¹ Lu lakona pangala sengo. Misa’ gelong bangunan ada’na Daud.

² Tonna sae tu Doëg, to Edom, umpokadanni Saul, nakua: Lanmo banuanna Ahimelekh tu Daud.

³ E to masa’ga’, ma’apari ammu sattuanra kalemu diona kakadakean? Iatu kamasokananNa Puang Matua inang tang tileluk.

⁴ Iatu tongka’ dililamu undaka’ bang kasanggangan, susi piso peku’ku’ mataran, e iko to umparri-parri kalando-pa’duan.

⁵ Mubudanan tu kakadakean anna iatu kameloan, sia mubudanan tu kamo’rangan anna iatu ussa’bu’ tonganna. Sela

⁶ Muporai ussa’bu’ kada mesanggangi sia muporai tu sadang mo’rang.

⁷ Iamoto anna la urrebong-rebongko Puang Matua sae lakona, la Nala’ka’iko anna pentu’murangko lan mai tendamu, sia la Naurakkiko lan mai tondok nanii to tuo. Sela

⁸ Iatu to malambu’ la natiro tu iannato situang taku’na, anna petaai nakua:

⁹ Tiromi, iamote tu to tang umpotambakuku Puang Matua, sangadinna sande’ lako ianan makambanna, sia ussanga kalena matoto’, tete dio kakadakeanna.

¹⁰ Apa aku te butungna’ garonto’ saitun maluna lan banuanNa Puang Matua; kuposande’ tu kamasokananNa Puang Matua sae lakona.

¹¹ Tang ka’tuna’ la umpudiKomi, belanna mangkamo Mipogau’ tu iannato, sia la kupeagi tu sangamMi belanna napomelo mintu’ to naala penaamMi.