PA’PUDIAN 49 - Sura' Madatu

To sugi’ baga 49:1-21

¹ Lu lakona pangala sengo. Pa’pudianna to Korah.

² Perangii te iannate, e mintu’ bangsa, patananni tu talingammi, e mintu’ banne lino,

³ La to bitti’ la to la’bi’ la to sugi’ la to kalala’, mintu’ massola nasang.

⁴ Kakinaan manna sun dio randan pudukku, sia kapaissanan manna natangnga’ ba’tengku.

⁵ Umpatananna’ talingangku lako kada peada’ to kinaa, sia la kupasombo dio oni katapi tu umpussakkinna penaangku.

⁶ Apara bannangna angku mataku’ra, ke allo kamaparrisan, ke napatama limbuna’ kakelokanna mintu’ to untananni sura kambutu’ku.

⁷ Iamotu to urrannuan iananna sia ussattuan kasugiran lallangna?

⁸ Moi misa’ tau tae’ nabelai ulla’bak siulu’na, ba’tu umpenombanni lako Puang Matua tu pesulang batang kalena,

⁹ – Belanna lendu’ masuli’na tu pela’bak deatanna, tae’ nabelai sae lakona. –

¹⁰ Kumua anna marendeng tuo, sia da nasitiro tang merambu.

¹¹ Belanna natiro tu to kinaa mate, sia iatu to baga sia to tang paissan pada sanggang duka, anna tampeanni to senga’ tu barang apanna.

¹² Nasanga penaanna kumua iatu banuanna la tontong marendeng sae lakona, sia iatu pa’tondokanna la nasiosso’i; iamoto anna pasikonai kalena tu mai padangna.

¹³ Apa iatu tolino sola kamala’biranna tae’ anna marendeng; sia iatu a’ganna sangtinti patuoan la ditunu.

¹⁴ Iamoto tu dalle’na to umposande’ bang kalena, iamo katampakanna to tu to umporai misa kadanna. Sela

¹⁵ Tau iato mai susi domba tileak tama lino to mate, na iatu to mangkambi’na iamotu kamatean; na to ma’bulo lollong la umparentai, ke melambi’; sia iatu a’gan merrupanna la naputtai lino kamatean, naurunganni tae’mo inanna.

¹⁶ Apa Puang Matua tu la ullendokan deatangku dio mai kuasanna lino to mate, belanna Ia unnangka’na’ langngan. Sela

¹⁷ Da ammu magiang, ke denni misa’ tau mellolo rangka’, sia samala’bi’-la’bi’na tu banuanna.

¹⁸ Belanna iake nalambi’mi kanna bunu’na moi misa’ apa tae’ anna baa lenni, sia tae’ anna la undi urrundu’i kamala’biranna.

¹⁹ Belanna moi anna sangai tu kalena kumua maupa’ tonna tuonapa, sia napudiko tau diona kamauparammu.

²⁰ Tae’ nasalai tang la umpengkara’paiko to dolomu, tu tae’mo nala sitiro len kamasiangan.

²¹ Iatu to unnappa’ kamala’biran, apa tae’ nakinaa, iamo sangtinti patuoan la ditunu.