PA’PUDIAN 38 - Sura' Madatu

Passambayangna to masaki kapua 38:1-23

¹ Pa’pudianna Daud. Ke dipennoloanni tu pemala’ kapengkilalan.

² O PUANG, da Mipandasana’ diona kasengkeamMi, sia da Mipa’dikkina’ diona kamare’dekamMi!

³ Belanna iatu mintu’ tinaranMi lambun nasangmo tama kaleku, sia lendu’ nati’tinku tu limamMi.

⁴ Makuyu langkan tu kaleku tu belanna kasengkeamMi, sia tae’mo memun tu mintu’ bukungku natumang kasalangku.

⁵ Belanna mintu’ kakadakeangku ungkabu’mo botto ulungku, sangtinti misa’ pamaan magasa tu untondon maro’na’.

⁶ Mintu’ bangkeku bubosi sia ma’nana, natumang kabagangku.

⁷ Tikongko-kongkona’ sia bukku’ tonganmo’, kiallo-kiallo butungna’ to sidudung pote.

⁸ Belanna mapa’dik tu aakku, sia makuyu langkan tu kaleku.

⁹ Iate aku te bo’yo’ tonganna’ sia bonnongna’, sia urrantangna’ sarro belanna karossoanna penaangku.

¹⁰ O Puang, mintu’ kamamalirangku Mitiro nasang, sia iatu sarroku tae’ nakarerungan dio mai Kalemi.

¹¹ Ma’baramba tu penaangku, sia tae’mo kamabukuangku, sia ia duka tu kamarorronganna matangku pa’demo.

¹² Mintu’ tu to kukamali’ sia sangmuaneku untoyangammo kalena, dio mai kamandasangku, sia mintu’na duka sangdadiangku urrandanammo kalena.

¹³ Iatu to la ungka’tu sunga’ku natanannina’ poya, sia iatu to undakaranna’ kasanggangan umbisara la kuposabu’na, sia untannun tangnga’ kadake kiallo-kiallo.

¹⁴ Apa aku te butung to taru, tang parangi, sia sangtintina’ to mamang tang tiku’bi’ tu pudukna;

¹⁵ Ondongpi aku te butungna’ to tang parangi, sia tang naissan ma’pabali.

¹⁶ Belanna Kamumo kutayan, o PUANG; manassa la Mipebaliina’, o PUANG, Kapenombangku.

¹⁷ Belanna kukua: Da naposendei tau iato mai tu kamandasangku, sia iake tilende’i tu lentekku, da napakapua penaanna lako kaleku

¹⁸ Belanna madomi’mo’ la tobang, sia iatu kamasussangku dio bangmo tingayoku.

¹⁹ Belanna la untuarasanna’ kakadakeangku, sia rosso penaangku natumang kasalangku.

²⁰ Apa mintu’ ualingku malaga’ sia matoto’, sia budamo tu to ungkabiri’ punala bangna’,

²¹ Sia to umpapakkanni kakadakean tu kameloan, sia naeamo’, belanna untuntunna’ kameloan.

²² O PUANG, da Mitampena’, o Kapenombangku, da Mitoyanganna’!

²³ Madomi’Komi untunduina’, o Puang, oto’na kasalamarangku.