PA’PUDIAN 140 - Sura' Madatu

Passambayang malaku dirinding pala’ dio mai mintu’ uali 140:1-14

¹ Lu lakona pangala sengo. Pa’pudianna Daud.

² O PUANG, rampananna’ dio mai to kadake, sia rinding pala’na’ dio mai to masa’ga’,

³ tu untannun sanda kadake lan ba’tangna, sia kiallo-kiallo umpabu’tu kasipakkan.

⁴ Tau iato mai umpamataran lilana susi ula’, sia dio randan pudukna tu ipo ula’ rakke’. Sela

⁵ O PUANG, rinding pala’na’ dio mai limanna to tang mekaaluk, sia kulambu tarunona’ dio mai to masa’ga’, tu morai la umpatilende’na’.

⁶ Iatu to matampo natananni bunina’ poya sia ulang, nae’te’ tu bunde dio biring lalan, sia natanannimo’ ba’tikan. Sela

⁷ Kukuami lako PUANG: Kamumo tu Kapenombangku, tananni talingamMi tu pengkamoyaku, o PUANG.

⁸ O PUANG, Puangku, patunduan matoto’ku, Misarongi tu ulungku ke tiosokki lempo kasirarian.

⁹ O PUANG, da Mipalolo’i tu pa’poraianna to tang mekaaluk, sia da Mipadanunni tu kasiturusan kadakena, da anna madongnga’. Sela

¹⁰ Nake nasamboi ipona sia kada kadakena sule tu mintu’ to umpatama limbuna’.

¹¹ Nake nasamboi ruaya tu tau iato mai; sia nake Napembuanganni Puang tama to’ api sia rokko posi’na tana, da nabangun sule.

¹² Iatu to pa’palele bekoan tae’ anna marendeng lan lino, sia la naula’ sumpu kamandasan tu to masa’ga’, anna sabu’i,

¹³ Kukanassai kumua Nasanda tonganni PUANG tu to dipandasa, sia katongananna to mase-mase.

¹⁴ Tonganna kumua iatu to malambu’ la umpudi sangamMi, sia iatu to bulo lollong la unnisung dio oloMi.