AYUB 41 - Sura' Madatu

¹ Moi misa’ tau tae’ barani urrosoi; ondong pissanpi mindara ma’din tumanan dio oloKu?

² Mindara ma’din umpessitamuiNa’, angKu eloranni tang matumba-tumba? Iatu mintu’na nasambo langi’, apangKu nasang.

³ Tae’ Kumorai ungkappanni tu mai tangkena sia kamawatangan maparrangna sia pa’kaleanna sitondon garaganna.

⁴ Mindara unnangka’i tu biring sambu’na? Mindara untarru’i tu bayu kararran duang papa’na?

⁵ Mindara umbungka’i tu ba’ba sadangna? Katirambanan untikui tu mai isinna.

⁶ Iatu balulang, tu urrerungi, ussamboi boko’na, siamping susito peca’ manda’ le’ke’.

⁷ Rapa’ tongan sikande, naurungan tang natamai angin;

⁸ manda’ le’ke’ tu misa’ lako senga’na, siapi’, anna tang tilendok len.

⁹ Iatu sumbaenna umpamian arrang, sia iatu matanna susito bulu mata kaberresanna allo.

¹⁰ Lan mai sadangna nanii bu’tu bia’ sia lelatu api tisambo’-sambo’ lan mai.

¹¹ Lan mai to’tok illongna nanii tassu’ rambu, susito kurin re’de ma’kalimbuang-buang.

¹² Iatu penaanna umpadukku ruaya, sia api dukku tassu’ lan mai sadangna.

¹³ Iatu sokkongna nanii kamawatangan, dio tingayona nanii kamarukkan napobua’ katirambanan.

¹⁴ Iatu duku’ ma’lemongna manda’ sikande, ma’dak tongan dio kalena susito pa’kombong.

¹⁵ Iatu ba’tengna makarra’ susito batu, makarra’ susito batu pangrissoan diongna lu.

¹⁶ Ianna adongan kalena, mataku’mi tu mai apa makuasa, tike’ken napobua’ katirambanan.

¹⁷ Iake den misa’ tau umba’tai pa’dang, tang natama, sia tang natama duka doke, doke lambaran sia tinaran.

¹⁸ Iatu bassi nasanga bang dalame, tambaga nasang kayu manapo.

¹⁹ Moi misa’ tinaran tae’ nakullei umpamallai, iatu batu dipa’lobangan membali susito dalame lako kalena.

²⁰ Iatu tarasulu’ nasanga bang dalame, metaa bang urrangi siukna doke dirokanni.

²¹ Diongna lu kalena nanii ba’tu pira-pira bibang mataran, naampa’ tu misa’ raki’ pa’lulluran diong to’ pullan.

²² Iatu tasik mandalan napoperre’de susito kurin, iatu tasik napapada to sere’ dinii unnasu salap.

²³ Iatu lalan mangka naolai dukku-dukku, naurunganni iatu liku mandalan nasanga tau uban.

²⁴ Tae’ padanna dao kuli’na padang, tu misa’ pa’padadi tang untandai kamatakuran.

²⁵ Napasolo’i penaa tu mintu’ matandena, sia undatui mintu’ olo’-olo’ matampo.