AYUB 39 - Sura' Madatu

¹ Ma’dinrokoka unnularan kandena singa birang, sia umpabossa kamailuanna anak singa,

² ke tukkui lan lo’ko’na, ba’tu mangamu’i lan to’ pangala’-ala’?

³ Mindara umpadenan kande kaduaya ke metambai tu anakna langngan Puang Matua, lu lako lu dio mai, tae’ nakande?

⁴ Mutandairaka tu attu nanii kianak bembe’ lampung? Mupemarangaraka tu kakianakanna donga birang?

⁵ Ma’dinraka muia’ tu bulan kakia’tanganna sia muissanraka tu attu nanii kianak?

⁶ Malimungkumi anna dadianni tu anakna, natibussananni tu bua pa’tambukanna.

⁷ Samatoto’-toto’na tu anakna, sia lobo’ dao kapadanganna, malemo ma’lingka anna tang sule lako indo’na.

⁸ Mindara umpopa’elo’na keledai lampung samale-malena, ondongpi, mindara ungko’ka’i ulangna keledai lamba’,

⁹ tu Kupamanassan padang rante la natorroi sia padang ma’sin la nanii ma’pasang?

¹⁰ Napetaai tu kamaruasanna kota, sia tang naperangii tu pelallakna to unnula’i;

¹¹ undaka’-daka’ bang la nakandena dao lu buntu sia sumalong untiro apa maluna.

¹² Morai siaraka tunduk lako kalemu tu sapi lampung, morairaka ma’bongi dio to’ inan pa’pakandean sapimmu?

¹³ Ma’dinraka muparuku unnulangi tu sapi lampung lan to’ pangkalo’ tengko? La ussalagaraka pa’lak diong lombok ammu rendenni?

¹⁴ Murannuammoraka, belanna tarru’ mawatang? Ba’tu musoronganraka tu kamara’takammu?

¹⁵ Musangaraka ma’din la unteke’ gandungmu lako pangrampa’ sia la messule-sule urrampunni dio to’ panglullurammu?

¹⁶ Marua’ sikapa-kapan tu pani’ burung unta; mamaseraka tu buku pani’na sia bulunna,

¹⁷ ke nalamba’i tu tallunna dio lu padang sia nasa’biangan nalassui bungin,

¹⁸ anna kalupai kumua dilese manii sia ma’din nalullu’ olo’-olo’ kapadanganna?

¹⁹ Makarra’ bang tu gau’na lako anakna, butung to tangia apanna; tang nadampang kumua tae’ gai’na tu kabo’yoranna.

²⁰ Belanna Puang Matua umpadapan kakinaan burung unta sia tae’ Napaketaai patiro penaa.

²¹ Iake barani kumapa-mapa male, napetaai tu darang sia pakkanarang.

²² Mubela siaraka umbengan kamawatangan lako darang sia umpakei tomba-tomba tu sokkongna?

²³ Mubela siaraka umpopekkondongi susito batik? Sumeke metakuran na mepatiramban.

²⁴ Parannu penaanna mekkae’-kae’ ullese lombok, sia situang kamawatanganna lu lako inan kasirarian;

²⁵ umpetaai kamatakuran sia tang magiang, sia tang sorong boko’ untiro pa’dang.

²⁶ Sigarentongan tu tambila dao boko’na, sia pandillak-dillak tu doke sia doke bandangan;

²⁷ tarru’ liu sia tang tipodo’ len unnampello’ padang sia tang diatta dipatanan, ke unnonimi tu tarompe’;

²⁸ ma’mehe’-mehe’, ke dipannonioi tu napiri tanduk sia mambelapa napebaumi tu inan kasirarian, sia iatu petambana pangulu sia pelallakna to sirari.

²⁹ Tete dioraka pa’inaammu, anna mettia’ tu langkan tasik anna balla’i tu pani’na ma’palusau’?

³⁰ Dionaraka parentamu anna mettia’ lu langngan tu tarru’ sia nagaragai tu serangna dao malangka’na,

³¹ dao buntu batu nanii sia natorroi dao tu lolok batu sia potok buntu?

³² Indeto dio mai nanii umpenunu kande, sia matanna ummanta-manta mambelai;

³³ iatu mai anakna ummimmi’ rara, sia umba tu nanii batang rabuk, inde dukato nanii.

Ayub umpamadiong kalena dio oloNa Puang Matua 39:34-38

³⁴ Ma’kadaomi tu PUANG lako Ayub, Nakua:

³⁵ Moraiparaka tu to pasayu la site’ge’ To umpoissan angge maritik? Iatu to umpasala Puang Matua la umpebalii tu iannato!

³⁶ Mebalimi tu Ayub lako PUANG, nakua:

³⁷ Manassa iate aku te tarru’ madiongna’, umba la kukua mebali lako Kalemi? Kutampun tu pudukku.

³⁸ Pissanmo’ ma’kada, apa tae’mo kula untolei; ondongpi penduan, apa tae’mo kula umpatarru’i.