1 TESALONIKA 3 - Sura' Madatu

Diona Timotius disua lako Tesalonika 3:1-10

¹ Iamoto iake tang kitananmi, kitangnga’mi, kumua la’bi’ ditampena’ misa-misa dio Atena.

² Angki sua Timotius siulu’ta, iamo misa’ to ma’kamayanNa Puang Matua lan kadipalolanganna Kareba-kaparannuanNa Kristus, la umpakananna’ sia umpakilalakomi diona kapatonganammi,

³ da anna den misa’ tau diparope tu penaanna lan mintu’ kamaparrisan iate. Belanna kamu kalena unnissanni kumua diona te mangkamiki’ dipaka’panni.

⁴ Belanna iatonta sisolapa, inang mangkamokomi kipokadan dolo, kumua la umperasaiki’ kamaparrisan, susitu dadinnamo sia miissanna duka.

⁵ Iamo bannangnato, natae’ tonganmo kutananni tu mamali’ku, kusuami mati’, kumua angku issanni tu kapatonganammi, belanna magiangna’, kumua mangkamokomi manii naroso to paroso, anna lao salamo tu kamara’tasangki.

⁶ Apa totemo mane mangka sule tu Timotius umbangkan kareba melo diona kapatonganammi sia pa’kaboro’mi sia iatu katontongammi ungkilalai melokan sia mamali’ la ussitiroangkan, susi duka kami lako kalemi.

⁷ Iamoto, e sangsiulurangki, napomatanamo penaangki tu diona kamu belanna kapatonganammi, moi anna kabu’kan kamaparrisangki sia kama- sussangki.

⁸ Belanna totemo tuomokan, ke bantangkomi lan Puang.

⁹ Apa pa’kurre sumanga’ umbamora tu la kipole paraan Puang Matua diona kamu, tu belanna mintu’na kaparannuan, kiposende bannang dio kamu dio oloNa Kapenombanta?

¹⁰ Keallo kebongi massambayang tongan-tongankan, dikua angki ma’din untiro rupammi sia urrangnganni tu kurangnapa lan kapatonganammi.

Rasulu’ umpassambayangan kombongan 3:11-13

¹¹ Dennoupa’ anNa Iamora, tu Puang Matua Ambe’ta sia Puangta Yesu umpalumati’i kalemi tu lalanki.

¹² Sia anNa Puangmora umpasake- rangngan-rangnganna kasiala-maseammi sia umpalempan kasiala-masean lako mintu’ tau susi kami unnala mase- komi.

¹³ AnNa pabatta’i tu penaammi, anna tae’ attangammi lan kamasalloran dio oloNa Puang Matua, Iamotu Ambe’ta, to ke attu kasaeanNa Puangta Yesu sola mintu’ to masallo’Na.