Zowɛli 4 - LAWA A BOO SONBORE

Dɛnaa n kiri kuri tɔrɔ kɔsɔn la

¹ Taãn nɛ! Bɛa biikoo lɛ li sonbore, ma á re wusii ma Zudaa gána laanka Zeruzalɛmu kiwi kɛ saa ma da a bǎã nɛ.

² Ma á re tɔrɔn tumaa soekɔn, nyankɔrɔ lɛ ke, ǹ nə́ bíi mà "Dɛnaa Lawa n kiri we", ma á re ǹ kiɛ bɛ nɛ. Ǹ sii mɛn zɛnaa maa zaman, Izirayeli, ma din wɔn kɛn manɛ, ma á re bɛa kiri we ǹ ganaa walan. A giala, ǹ nə́ ǹ sasawaa, ǹ nə́ ǹ kaa tɔrɔ kɔsɔn bii, ǹ nə́ maa gána lɛ gii kɔn.

³ Ǹ nə́ n pã maa minin lɛn ganaa, ǹ nə́ ǹ gii kɔn. Ǹ nə́ ǹ nɛgiĩn sã, ǹ nə́ lɔ kɔrɔn pii ka a paa nɛ. Ǹ nə́ ǹ nɛlɔn sã, ǹ nə́ duvɛ̃ pii ka a paa nɛ ǹ nə́ mi.

⁴ Kasɛn Tiiri minin laanka Sidɔn minin kɛn dɔn, ka Filisiti kiwin kɛn tumaa a minin ni, kaa wàa-n ma gɔn? Ka n die kaa gɛ̀ dòo boe ma ganaa? Bɛ̀ ka n masɛ gialaa sonbore, á bǐɛ̃ kɔ! Min goon bie gɛ̀ dòo boe wa. Ma dɔ á re doe a ganaa, ma bɔ ka ganaa, a din bǎã nɛ.

⁵ Ka dinin lɛn man ká maa sana laanka maa wɔrɔ lɛ goa, ma gɔn màn sonboren kɛn, ká woo bɛn kaa kaa dì kionən kɛn nɛ.

⁶ Ka dinin lɛn dɔn man ká Zudaa minin laanka Zeruzalɛmu minin sã Grɛsi minin la, ká ǹ wɔlɔ lui ǹ dinin gána ganaa.

⁷ Sɛnɛ, ka ǹ sã bǎã mɛn nɛ, masɛ á re wusii ma ǹ waa walan, ma da ǹ nɛ. Ka sii baraa mɛn zɛnaa, ma á re a dɔlɔ diɛ ka mìi ni.

⁸ Ma á re kaa nɛgiĩn laanka kaa nɛlɔn siɛ̃ Zudaa gána minin kɛn la. Bɛn dɔn tá re ǹ siɛ̃ Saabaa minin kɛn la, ǹ mɛnɛn lɛn wɔlɔ bɛ́ lui-n kànaa ganaa. Ma din Dɛnaa Lawa-n má pɛ.

⁹ Ka kɛ pɛ tɔrɔ kɔsɔn lɛn manɛ: ka n yɔrɔ bɔ zia-baa taman yii. Ka min kakan lɛn foo taã, zia-baalin lɛn tumaa nə n mɔrɔ, ǹ wo zia la.

¹⁰ Ka kaa kána nànan bɔyaa, ka ǹ baa gɔya san lɛa, ka kaa sɛǹ gɔyan bɔyaa, ka ǹ baa sɛmiɛ̃n lɛa. Pàã wɛɛ bɛ́ min mɛn ganaa, bɛ pɛ mà: «Giĩ-n ka masɛ nɛ!»

¹¹ Tɔrɔ kɔsɔn lɛn tumaa, ka yiɛ bǎã yii ni ka daa, ka da ka baa nɛ ka n lɛ sɔkɔn. Dɛnaa Lawa, n din nə n min kakan lɛn dia, ǹ da gisĩ kànaa!

¹² Dɛnaa Lawa n kɛ pii: Tɔrɔn tumaa yoo ǹ mɛ zii la, ǹ wo nyankɔrɔ basa kɛ nɛ, ǹ bɛ́ ǹ mɛn lɛ bíi mà «Dɛnaa Lawa n kiri we.» Man die giɛ̃ tán walan lɛn, ma kiri wɔ tɔrɔ kɔsɔn kɛn tumaa ganaa, ǹ mɛnɛn bɛ́ ka lɛnpɛnɛ.

¹³ Ka kaa sɛǹ gɔyan goa, a giala, ǹ kurii dɔ ka *belee bɛ́ lɔn. Ka ǹ tɔtɔrɔ ka gòãn li, ka rezɛ̃ bɛ́ lɔn, a giala bɛa minin lɛn baraabaa la yii ni.

¹⁴ Nyankɔrɔ lɛ ke, kiri wɔ ǹ bǎã lɛa, zaman tá die walan girigiri. A giala, Dɛnaa Lawa bɛ́ re n din nyɛɛ walan ǹ mɛn pinaa, bɛa lɛawaa diri.

¹⁵ Wasa laanka mui á re tii ka wɔlɔ tì bɛ́ lɔn, leeren ba re tɛ-pii doo wa.

¹⁶ Dɛnaa Lawa nə n toɛ *Siɔn kele la á n wɔɔsaa we a nə n toɛ Zeruzalɛmu á n paraa we. Lon laanka tán nə́ ke bìn diɛ. Sɛnɛ, Dɛnaa Lawa din na a zaman tamaɛ, Izirayeli minin lɛn man kiɛ a din yele.

¹⁷ Dɛnaa Lawa kɛ pɛ ǹ nɛ: Ka á re doɛ̃ kəni, mà masɛ Dɛnaa Lawa n kaa Lawa lɛa. Ma din lɛ n giã-n Siɔn kele kɛ la, maa kele sonbore lɛ. Zeruzalɛmu á re wusii a maa wɔ baa duduu, tiin ba re we a-n doo duduu wa.

Lawa a zaman a yii-nyɛɛ yɛ

¹⁸ Bɛa pinaa kɛ nɛ, duvɛ̃ dii á re baa sii kelen la, bɔ̀nyaa dɔ á re baa sii tentenen la, Zudaa gána a pɛrɛn kɛn tumaa á re piɛ̃ ka mu ni. Mu á re pìã woɛ̃ Dɛnaa Lawa a kion kɛ nɛ, a din lɛ n die Sitimu a nyankɔrɔ lɛ kɛ basɛ̃.

¹⁹ Ezipti gána kɛ gɔ́ɔ̃ kooro á die goɛ̃, Edɔmu gána kɛ á re don gɔ́ɔ̃ kooro-a biɛ. A giala, ǹ nə́ kakaarɛbaa ǹ sii zɛnaa Zudaa minin lɛn manɛ, ǹ nə́ ǹ dɛ ǹ dinin gána nɛ, a da yaa, ǹ sii dɔ la wa.

^20-21 Sonbore, masɛ máa ǹ sii la wa. Bɛ lɛ n ke, minin tá re goɛ̃ Zudaa gána lɛ-n miɛ̃ duduu, minin tá re goɛ̃ Zeruzalɛmu kiwi kɛ nɛ biikoo tumaa li, ma dinmaa Dɛnaa Lawa n die giɛ̃ Siɔn kele kɛ la.